Կյանքից հեռացել է Հրանտ Հակոբյանը
Մահացել է վավերագրող կինոռեժիսոր, թատրոնի ռեժիսոր Հրանտ Հակոբյանը, որը նշանակալի հետք ու ինքնատիպ ձեռագիր է թողել թատրոնում և կինոյում։ Այս մասին հայտնում է Հայաստանի կինոգործիչների միությունը։
«Նա կենսախինդ էր, կյանքը սիրող, կյանքով ապրող մարդ, հուշերով, հիշողություններով, անցյալով ու առավելապես ներկայով ու ապագայով ապրող մարդ, լավատես ու լավը սիրող, ընկերություն, միջավայր սիրող, ընտանիք սիրող մարդ։ Երբ հարցնում էինք՝ ինչպե՞ս ես, ասում էր՝ ասենք լավ ենք ու դրանով խոսում էր ինքն իր մասին։ Այդպես էլ պայքարեց կյանքի համար, ապրելու համար, պայքարեց, չնահանջեց, երբեք հույսը չկորցրեց, հավատաց, որ առողջանալու է, յուրաքանչյուր օր, երբ մի քիչ լավ էր զգում, գալիս էր դեպի իր միջավայրը, իրեն հարազատ միջավայրը, բայց․․․»,- ասվում է միության հաղորդագրության մեջ։
Հրանտ Հակոբյանը ծնվել է 1950 թվականին Երևանում։ 1974 թվականին ավարտել է Երևանի Խ. Աբովյանի անվան մանկավարժական ինստիտուտի կուլտուրայի ֆակուլտետը՝ Լ. Վաղարշյանի արվեստանոցը։ Այնուհետև՝ 1974-1979 թվականներին, աշխատել է որպես ռեժիսոր Իջևանի թատրոնում, ապա՝ որպես ռեժիսորի ասիստենտ և երկրորդ ռեժիսոր՝ «Հայֆիլմ» կինոստուդիայում։
1982 թվականին վերաորակավորում է անցել Մ. Գորկու անվան ստուդիայում, իսկ 1987 թվականից աշխատել է որպես ռեժիսոր «Հայկ» ստուդիայում։
Նրա նկարահանած ֆիլմերից են «Բաղոյաններ»-ը, «Մարսը մեր կողքին է»-ը, «Շրջափակում»-ը, «Խաղաղ դեսանտ»-ը, «Մոնթե»-ն, «Հաղթանակի օրը»-ը, «Մեծ քաղաքի փոքրիկ մարդը»-ը, «Համահայկական խաղեր»-ը, «Արամ Խաչատրյան»-ը, «Դիմակայում»-ը և մի շարք այլ աշխատանքներ։
