Մահացու որս․ Աֆրիկայում սաֆարիի ժամանակ փղերը ոտնակոխ են արել միլիոնատեր որսորդին

75-ամյա ամերիկացի միլիոնատեր և որսորդ Էրնի Դոզիոն, որը հայտնի էր գավաթային որսի հանդեպ իր հետաքրքրությամբ և Կալիֆոռնիայում գինեգործարան ունենալով, ողբերգականորեն մահացել է Գաբոնում, հաղորդում է NYP-ն։

Աղբյուրների համաձայն՝ նա գտնվում էր աֆրիկյան անտառում պրոֆեսիոնալ ուղեկցորդի հետ՝ մասնակցելով մոտ 40 հազար դոլար արժողությամբ սաֆարիի։ Նրանց թիրախը փոքր այծքաղ էր, սակայն իրավիճակը դուրս է եկել վերահսկողությունից, երբ նրանք հանդիպել են անտառային փղերի հոտի, որը ձագերով էր։

Ականատեսների խոսքով՝ կենդանիները արագ արձագանքել են՝ զգալով վտանգը, և անմիջապես հարձակվել են։ Խիտ անտառում տեսանելիությունը սահմանափակ է եղել, ինչի պատճառով որսորդները ուշ են նկատել մոտեցող փղերին։ Հարձակման հետևանքով Դոզիոն շպրտվել է և ոտնակոխ եղել մի քանի կենդանիների կողմից։ Ուղեկցորդը նույնպես լուրջ վնասվածքներ է ստացել և կորցրել է իր զենքը։

Դեպքին ծանոթ աղբյուրները նշում են, որ ամեն ինչ տեղի է ունեցել վայրկյանների ընթացքում՝ «կարծես կենդանիները հանկարծակի հայտնվել էին»։ Ընդգծվում է նաև, որ որսորդներն ունեցել են թեթև զենքեր, որոնք անարդյունավետ են եղել զայրացած հոտի դեմ։

Ողբերգության որոշակի հեգնանքն այն է, որ Դոզիոն համարվում էր փորձառու գավաթային որսորդ։ Իր կյանքի ընթացքում նա մասնակցել էր բազմաթիվ սաֆարիների Աֆրիկայում և Միացյալ Նահանգներում՝ ունենալով գավաթների մեծ հավաքածու, որը ներառում էր փղեր, առյուծներ, ռնգեղջյուրներ և այլ խոշոր կենդանիներ։

Դոզիոն նաև գինեգործարան ուներ Կալիֆոռնիայում և հայտնի էր որսորդական շրջանակներում։ Միևնույն ժամանակ, ընկերների խոսքով, նա ակտիվորեն զբաղվում էր բարեգործությամբ և ներգրավված էր տեղական համայնքային կյանքում։

Դեպքից հետո նրա մարմինը նախատեսվում է հայրենադարձել Միացյալ Նահանգներ, որտեղ նա բնակվում էր ընտանիքի հետ։