Արտակարգ դեպք՝ Երևանում․ Նուբարաշենից 13 հոգի, որոնցից 6-ը երեխաներ են թունավորումով տեղափոխվել են հիվանդանոցներ

Այսօր՝ փետրվարի 18-ին, արտակարգ դեպք է տեղի ունեցել Երևանում։ Ժամը 20։20-ից 20։40-ն ընկած ժամանակահատվածում  Երևանի 1-03 շտապօգնության բժիշկների հերթապահ խմբերը «Մուրացան» մանկական հիվանդանոց և «Արմենիա» բժշկական կենտրոն են տեղափոխել մեծ թվով քաղաքացիների։

Shamshyan.com-ի փոխանցմամբ՝ այդ քաղաքացիները տեղափոխվել են Նուբարաշեն վարչական շրջանից, 6 երեխա, որոնց տարիքները 3, 4, 5, 7, 10 և 14 է, տեղափոխվել են «Մուրացան» բժշկական կենտրոն, նրանցից մի մասի վիճակը գնահատվում է միջին ծանրության, իսկ մեկինը՝ ծանր, իսկ 7 հոգի էլ տեղափոխվել է «Արմենիա» բժշկական կենտրոն, ովքեր մեծահասակներ են։

Պարզվել է, որ նշված անձինք տեղափոխվել են 5-րդ փողոցի տներից մեկից, որտեղ հյուրասենյակում մասնակցելիս են եղել խնջույքի արարողությանը, որտեղ նաև տեղադրված է եղել փայտե վառարան։

Ըստ նախնական տեղեկությունների՝ հնարավոր է նշված անձինք ունեցել են սննդային թունավորում։ Այս պահին տարածքը սահմանազատել են ոստիկանության Նուբարաշենի բաժանմունքի ծառայողները և ահազանգը փոխանցել են Հայաստանի Քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժին, որտեղից պետք  է ժամանի քննչական խումբը։

Հարևանները, ովքեր հրաժարվում են տեսախցիկի առաջ խոսել, ասում էին, որ սենյակը որտեղից բոլորը տեղափոխվել են հիվանդանոցներ, գազի վառարան չի ունեցել, սակայն տաքացվել է փայտե վառարանով ու հիմա կամ փայտե վառարանից առաջացած շմոլ գազից են թունավորվել, կամ էլ՝ սննդից։