43-ամյա վարորդը վրաերթի է ենթարկել փողոցը չթույլատրելի հատվածով հատող ազգությամբ հնդիկ հետիոտնի
Այսօր՝ հոկտեմբերի 22-ին, վրաերթ է տեղի ունեցել Երևանում։ Ժամը 07։50-ի սահմաններում Արտաշատի խճուղում Վայոց ձորի մարզի բնակիչ 43-ամյա Վարդան Մ․-ն իր վարած «Toyota» մակնիշի ավտոմեքենայով վրաերթի է ենթարկել փողոցը չթույլատրելի հատվածով հատող՝ ազգությամբ հնդիկ հետիոտնի։
Ինչպես հայտնում է ֆոտոլրագրող Գագիկ Շամշյանը, վարորդը փախուստի չի դիմել, ահազանգել է շտապօգնություն, և օպերատիվորեն ժամանած շտապօգնության բժիշկների հերթապահ խումբը վրաերթի ենթարկվածին նախ տեղում առաջին բուժօգնություն է ցուցաբերել, ապա տեղափոխել «Էրեբունի» բժշկական կենտրոն։
Դեպքի փաստով քննչական բաժնում նախաձեռնվել է քրեական վարույթ, որտեղ էլ պարզվում է վրաերթի ենթարկվածի ինքնությունը։
Վարորդը ենթարկվել է սթափության փորձաքննության և եղել է սթափ։
Քննիչի հանձնարարականով ավտոմեքենան տեղափոխվում է ՊԾ Երևան քաղաքի գնդի պահպանվող հատուկ տարածք։
SHAMSHYAN.com-ը ներկայացնում է բացառիկ տեսանյութ, թե ինչպես է տեղի ունեցել վրաերթը։ Բացառիկ տեսանյութը՝ SHAMSHYAN.com-ի տելեգրամյան ալիքում։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։
