Կրակոցներ Էջմիածնում․ տուժածը գեներալ Մանվել Գրիգորյանի դատավոր դստեր որդին է

ArmLur.am-ին էջմիածնում տեղի ունեցած միջադեպից մանրամասներ են հայտնի դարձել։ Մասնավորապես, վիճաբանողների մեջ է եղել գեներալ Մանվել Գրիգորյանի դստեր՝ նախկին դատավոր Նաիրա Գրիգորյանի որդին՝ Սեյրան Արտակի Պողոսյանը։

Նա հիվանդանոցում է և նրան են վնասվածքներ հասցրել։

ՆԳՆ-ից հայտնում են, որ Վաղարշապատում տեղի ունեցած խուլիգանության դեպքի շրջանակում հայտնաբերվել է հանցագործության գործիք հանդիսացող մեկնարկային ատրճանակը։

Գերատեսչության տվյալներով՝ մայիսի 14-ին հիվանդանոցից ահազանգ է ստացվել, որ կտրած-ծակած վնասվածքներով բուժօգնության է դիմել Էջմիածնի 15-ամյա բնակիչ։

Դեպքի առթիվ օպերատիվ գործողություններ են իրականացրել համայնքային ոստիկանության Վաղարշապատի բաժնի ծառայողները։

Ձեռնարկված միջոցառումների արդյունքում խուլիգանություն կատարելու կասկածանքով ձերբակալվել և բաժին են տեղափոխվել Էջմիածնի 18-ամյա երկու բնակիչներ։

Պարզվել է, որ վիճաբանության ընթացքում Կոտայքի մարզի Նոր Գեղի գյուղի բնակիչը դանակահարել է անչափահասին, իսկ մյուս մասնակիցներից մեկը մեկնարկային ատրճանակով կրակել է օդ։

Դեպքի առթիվ նախաձեռնվել է քրեական վարույթ՝ խուլիգանության և առողջությանը միջին ծանրության վնաս պատճառելու հատկանիշներով։ Իրավապահները շարունակում են միջոցառումները՝ դեպքի բոլոր մասնակիցներին հայտնաբերելու ուղղությամբ։