«Ծաղկաձորում ուրիշ հարցով եմ եղել». Ովքե՞ր են եղել ՈՎՔԵ՞Ր ԵՆ ԵՂԵԼ «Ռոյալ» խաղատան կրակոցների կիզակետում

«Ծաղկաձորում ուրիշ հարցով եմ եղել». Ովքե՞ր են եղել ՈՎՔԵ՞Ր ԵՆ ԵՂԵԼ «Ռոյալ» խաղատան կրակոցների կիզակետում

Hraparak.am-ը գրում է․ Երեկ տեղեկություն տարածվեց, որ նախօրեին գիշերը ուշ ժամի կրակոցներ են հնչել Ծաղկաձորի «Ռոյալ» խաղատան մոտ, որտեղ ներկա է եղել հանրապետության քաղաքապետերից մեկը: Ըստ տեղեկության` իրավապահները այդ քաղաքապետին են փնտրում, որը դեպքի վայրից հեռացել է:

Hraparak.am-ին որոշակի մանրամասներ են հայտնի դարձել միջադեպից: Մեզ ասացին` նշված քաղաքապետը Արթիկի քաղաքապետ Մխիթար Վարագյանն է եղել, որը, սակայն, կրակոցների հետ կապ չի ունեցել, պարզապես խաղատանն է եղել, և կրակոցներից հետո արագ հեռացել է, որ իր անունը չկապվի միջադեպի հետ: 

Իսկ միջադեպի կիզակետում, ասացին, իշխանությունների մերձավոր կրիմինալ դեմքերից մեկն է եղել, քրեական պատմություններով հայտնի Ռուստամ Ստեփանյանը` Չաղ Ռուստամը: Վերջինս որոշ ժամանակ առաջ էլի էր կրակոցների կիզակետում հայտնվել: Տուժողներ չկան, ասացին` կրակոցներից հետո ինչ-որ անձինք մեքենան թողել փախել են անտառ:

Նախնական տեղեկությամբ` միջադեպի հիմքում հին վեճ է եղել, և Ռուստամն ու մյուս կողմը պատահաբար հանդիպել են խաղատանն ու հիշել հին հաշիվները:

Թեմայի վերաբերյալ կապ հաստատեցինք Արթիկի քաղաքապետ Մխիթար Վարագյանի հետ: Վերջինս հարցը լսելուն պես`զարմացավ. «Էդ ո՞վ է ասողը, ով որ տենց բան է ասել, զանգեք իրեն, խի՞ եք ինձ զանգել»: Ապա հավելեց` չկա նման բան:

Երբ նկատեցինք, որ մեզ ասել են` ինքը կրակոցների պահին ներկա է եղել խաղատանը, հետո հեռացել է, Արթիկի քաղաքապետը նորից զարմացավ. «Ո՞նց թե՝ Դուք ներկա եք եղել, հետո հեռացել եք: Ասում եմ` չկա նման բան»:

Հարցրինք` Ծաղկաձորում չի՞ եղել այդ օրը: «Ծաղկաձորում ուրիշ հարցով եմ եղել»,-հաստատեց Վարագյանը:

Իսկ տվյալ խաղատանը եղե՞լ է:

«Ասում եմ` չէ, ես ընդհանրապես տեղյակ չեմ էդ միջադեպից, հիմա էլ զբաղված եմ»,-հարցը ցրեց քաղաքապետն ու անջատեց հեռախոսը: