Դիմակավորված տղամարդիկ Գեղամասարի խանութներից մեկից փորձել են բանկոմատ գողանալ (Տեսանյութ)
Դիմակավորված տղամարդիկ Գեղամասարի խանութներից մեկից փորձել են բանկոմատ գողանալ (Տեսանյութ)
Դիմակավորված երկու տղամարդիկ Վարդենիս խոշորացված համայնքի Գեղամասար բնակավայրի խանութներից մեկից փորձել են բանկոմատ գողանալ։ Տեղեկությունը հայտնում է ոստիկանության մամուլի ծառայությունը։
Խանութի պահակը դեպքի վայր մեկնած ոստիկաններին հայտնել է, որ տեսել է , թե ինչպես են դիմակավորված տղամարդիկ տեխնիկական միջոցների գործադրմամբ կոտրել խանութի դռան փականը, մտել ներս և փորձել գողանալ բանկոմատը, բայց երբ տեսել են պահակին, «Mitsubishi Pajero» մակնիշի ավտոմեքենայով դիմել են փախուստի։
Ոստիկաններն օրեր անց հայտնաբերել և ոստիկանության բաժին են ներկայացրել 28 և 38 տարեկան երկու տղամարդու, որոնք եղել են Սոթքի բնակիչներ։
Պարզվել է, որ 28–ամյա տղամարդը քրոջ ամուսնու հետ «Mitsubishi Pajero» մակնիշի ավտոմեքենայով մեկնել են Գեղամասար, կոտրել խանութի դռան փականը, փորձել են գողանալ բանկոմատը, բայց տեսնելով պահակին, դիմել են փախուստի։
Մեքենան տեղափոխվել է Վարդենիսի բաժնի հատուկ պահպանվող տարածք։ Տղամարդիկ ներկայացվել են վարույթն իրականացնող մարմնին։