«Ես ու ամուսինս չենք սիրում նկարներ հրապարակել»․ Սոնա Շահգելդյանը՝ ամուսնու, որդու և շարֆերի հավաքածու ներկայացնելու մասին

Սոնա Շահգելդյանն այս ընթացքում հագեցած առօրյա ունի՝ ժամանակ է տրամադրում ինչպես որդու հետ զբոսանքներին, նրա դաստիարակությանը, այնպես էլ աշխատանքային նորություններով ներկայանալուն։ «Ես ու ամուսինս չենք սիրում նկարներ հրապարակել»․ Սոնա Շահգելդյանը՝ ամուսնու, որդու և շարֆերի հավաքածու ներկայացնելու մասին

Tert.am Life-ի հետ զրույցում Սոնան ասաց, որ միանգամից մի քանի աշխատանք ունի՝ երաժշտական նորություններից զատ շարֆերի նոր հավաքածու է ներկայացնելու, բացի այդ, խոսեց ընտանիքի՝ որդու և ամուսնու մասին։

Պարզվում է՝ Սոնան պատրաստում է ներկայացնել շարֆերի անվանական հավաքածու։ Ինչ տեսք կունենան դրանք, երգչուհին առայժմ շատ չի մանրամասնում, սակայն առաջին նմուշները տրամադրել է մեզ: Սոնայի խոսքով՝ սահմանափակ հավաքածու է, որը հասանելի կլինի շատ շուտով։

Դիտարկմանը, որ իր ոճը ոչ միշտ է ընդունվում, հաճախ  քննադատվում է, իր կարծիքով՝ այդ հանգամանքն ինչպե՞ս կազդի հավաքածույի վրա, Սոնան արձագանքեց․ «Իմ ոճի հետ կապված քննադատություններ շատ չեմ նկատել: Եթե անկեղծ, նկատելու դեպքում էլ աշխատում եմ ուշադրություն չդարձնել։ Երբեք որևէ մեկից որևէ միտք չեմ գողացել, ես ունեմ իմ ուրույն ոճը և աշխատում եմ պրոֆեսիոնալ մարդկանց հետ»։ Թե ինչպես կընդունվի իր հավաքածուն լսարանի կողմից, ըստ երգչուհու, պարզ կլինի միայն այն թողարկելուց հետո։

Երգչուհին շարֆերի հավաքածուն ստեղծել է մտերիմներից մեկի՝ դիզայներ-նկարչուհի Մարիա Ակլունցի հետ։ Վերջինս էսքիզներն է անում, մտահղացումը՝ Սոնայինն է։ «Ժամանակին ունեցել եմ պայուսակների հավաքածու, որը նույնպես իմ անուն-ազգանունով էր ներկայացվում։ Հիմա որոշեցի հայկական նախշերով շարֆեր ներկայացնել։ Առայժմ ոչ ոք չի տեսել դրանք, բայց կարծում եմ՝ այն, ինչ արել և անում եմ, լավ է ստացվում, կարևորը՝ սրտանց եմ անում։ Նշեմ, որ ամբողջությամբ իմ մտքերն են։ Ավելի ուշ կլինի ֆոտոշարք և մարդիկ կկարողանան ծանոթանալ հավաքածուին։ Բացի վաճառքը նաև բարգործություն անելու մտահղացում ունեմ»,- ասաց Սոնան։

Բացի շարֆերի հավաքածու ներկայացնելը, երգչուհին պատրաստում է երաժշտական նոր տեսահոլովակ, որի մանրամասներին դեռ կանդրադառնանք։

Սոնայի խոսքով՝ աշխատանքային հագեցած գրաֆիկի ընթացքում փորձում է հնարավորինս շատ ժամանակ հատկացնել ընտանիքին, կարևորում է երեխայի հետ անցկացրած ժամանակը։ Որդու խնամքի գործում Սոնային օգնում է պրոդյուսեր-մայրիկը՝ Անահիտը։

«Չնայած բալիկիս խնամքով հիմա մայրիկս է զբաղվում, ես էլ փորձում եմ ամեն ինչ հասցնել՝ համատեղել թե՛ երեխայիս հետ ժամանակ անցկացնելը, թե՛ նորություններով հանդես գալը։ Մայրս, իսկապես, ինձ շատ է աջակցում, միշտ իմ կողքին է, հիմա էլ բալիկովս է զբաղվում։ Բալիկս շատ տաղանդավոր երեխա է, կարծում եմ այդպես է, որովհետև ես եմ իր մայրիկը»,- ժպիտով ասաց Սոնան ու հավելեց, որ երեք տարեկան Արթուրի հետ սիրում է գնալ քաղաքի այգիներ։

«Երբ այգի ենք գնում, ամբողջությամբ թաց ենք վերադառնում տուն։ Շատ-շատ չարաճճի, ակտիվ ու աշխույժ, բայց խելացի ու հասկացող երեխա է տղաս։  Չնայած տարիքին՝ հետաքրքրությունները բավականին շատ են, ինքն իր համար կարողանում է զբաղմունքներ գտնել։ Հիմա հետաքրքրված է նկարչությամբ՝ շատ ժամանակ է անցկացնում նկարելով։ Դե իմ երգերն արդեն անգիր գիտի՝ երգում է, պարում, արդեն մտածում եմ, թե հետագայում ինչ ուղի է ընտրելու։

Բնավորությամբ այնպիսի մարդ եմ, որ եթե նկատեմ տաղանդ չունի, իրեն չեմ ուղղորդի այս ասպարեզ։ Այնպես չէ, որ եթե Սոնայի երեխան է, պետք է անպայման երգի։ Դա ժամանակի հետ կհասկանամ, բայց այն․ որ արվեստի կողմն է ընտրելու, արդեն նկատելի է»,- ասաց երգչուհին՝ հավելելով, որ որքան էլ տաղանդավոր կամ հետաքրքրասեր լինի երեխան, ինքը շատ է կարևորում մարդկային տեսակը, առաջին հերթին ուզում է ուղղակի լավ մարդու մեծացնել։

Օրեր առաջ Սոնան գրել էր, որ իրեն և դիզայներ Գեղամ Շերոյանին սիրավեպ են վերագրում, ինչը չի համապատասխանում իրականությանը: Ինչ վերաբերում է ամուսնու հետ հարաբերություններին և քննարկումներին, թե Սոնան իրականում ամուսնացած չէ, երգչուհին ասաց․ «Ես ունեմ շատ լավ ընտանիք՝ ես ու Նարեկն ամուսնացել ենք 2014 թվականին, 2015-ին ծնվել է բալիկս՝ Արթուրը։

Կյանքի իմաստը, կարծում եմ, այն չէ, որ Ֆեյսբուքում անընդհատ ընտանեկան լուսանկարներ տեղադրես ու ցուցադրես։ Մենք նման բաներ չենք սիրում: Կարծում եմ՝ շատերն են նկատել՝ ինձ մոտ հիմնականում աշխատանքային լուսանկարներ են, որոնք այն մարդկանց համար է, ովքեր ինձ սիրում են, գնահատում»։

Աղբյուր՝ tert.am