Գործազուրկներին մինչև 300 հազար դրամ կտրամադրեն․ նոր ծրագիր
2027 թ.-ի հունվարի 1-ից զորացրված գործազուրկները, Արցախից տեղահանված անձինք և անապահով ընտանիքների աշխատունակ անդամները կարող են մասնակցել զբաղվածության ապահովման նոր ծրագրին։ Վաուչերով ուսուցում անցնելուց և աշխատանքի ընդունվելուց հետո շահառուն կստանա 100 000 դրամ, եթե աշխատանքային հարաբերությունները շարունակվեն 3 ամիս, և ևս 200 000 դրամ՝ 12 ամիս շարունակվելու դեպքում։
Ինչպես տեղեկացնում է Iravaban.net-ը, ծրագիրը հաստատվել է կառավարության 2026 թ.-ի հոկտեմբերի 22-ի N 1524-Լ որոշմամբ, իսկ շահառուին վճարվող գումարները սահմանված են որոշման հավելվածի 17-րդ կետով։ Նույն որոշմամբ ուժը կորցրած են ճանաչվում նախկին երեք ծրագրերը, սակայն նոր կարգը չի տարածվում դրանցով մինչև 2027 թ.-ի հունվարի 1-ը կնքված պայմանագրերի վրա։
Ո՞վ կարող է մասնակցել ծրագրին
Գործազուրկի կարգավիճակ ունեցող անձինք, որոնց ժամկետային պարտադիր զինվորական ծառայությունից զորացրվելուց հետո չի անցել 2 տարի։
2020 և 2023 թվականներին Ղարաբաղից տեղահանված անձինք, որոնք Հայաստանում զբաղված չեն։
Սոցիալապես անապահով ճանաչված ընտանիքի աշխատունակ անդամները, եթե ընտանիքի մեկ հաշվարկային անդամի ամսական եկամուտը ցածր է անապահովության նպաստի իրավունք տվող շեմի 130 տոկոսից։
Առաջին երկու խմբերի համար պարտադիր է նաև, որ վերջին երեք ամսում աշխատավարձ կամ դրան հավասարեցված վճարում չլինի։ Բոլոր խմբերի համար՝ անձը երբևէ ընդգրկված չպետք է եղած լինի համապատասխան նախկին պետական ծրագրում։
Ինչպե՞ս է աշխատում ծրագիրը
Պետք է հաշվառվել e-work.am հարթակում և դիմել ծրագրում ընդգրկվելու համար։ Պայմաններին համապատասխանելու դեպքում հարթակում ինքնաշխատ ձևավորվում է մինչև 250 000 դրամ արժողությամբ վաուչեր, որը կարելի է օգտագործել մեկ անգամ՝ 6 ամսվա ընթացքում։ Դասընթացն ավարտելուց և վկայական ստանալուց հետո ծրագրով աշխատանքի եք ընդունվում վկայականում նշված մասնագիտությամբ՝ առնվազն 3 ամիս ժամկետով և, որպես կանոն, մեկ դրույքով աշխատանքային պայմանագրով։
Ե՞րբ է վճարվում գումարը
100 000 դրամը և 200 000 դրամը փոխանցվում են շահառուի բանկային հաշվին՝ մինչև աշխատանքային պայմանագրի գործողության համապատասխանաբար 3-րդ և 12-րդ ամիսները լրանալուն հաջորդող ամսվա վերջին աշխատանքային օրը։
Ե՞րբ կարող է աջակցությունը դադարեցվել
Գործատուի կամ շահառուի դիմումով։
Եթե ծրագրի շրջանակում կնքված աշխատանքային պայմանագիրը լուծվել է։
Եթե նախորդ ամսվա համար շահառուի աշխատավարձից հաշվարկված և վճարված եկամտային հարկը զրոյական է։
Շահառուի մահվան դեպքում։
Շահառուի նպատակային արձակուրդի ընթացքում ծրագիրը կասեցվում է և վերսկսվում է արձակուրդն ավարտվելուն հաջորդող օրվանից։
