Աննա Հակոբյանը Հաց բերողի մորը անձնազոհության համար հանձնել է մրցանակ
Աննա Հակոբյանը Հաց բերողի մորը անձնազոհության համար հանձնել է մրցանակ
Հայաստանի Հանրապետության վարչապետի տիկին Աննա Հակոբյանը մարտի 20-ին այցելել է Արթուր Սարգսյանի (Հաց բերողը) մորը՝ Դոնարա Սարգսյանին և հանձնել «Հայկական ժամանակ» օրաթերթի «Տիգրան Հայրապետյան»-ի անվան մրցանակը:
Ինչպես հայտնեցին ՀՀ վարչապետի տիկին Աննա Հակոբյանի գրասենյակից, շնորհակալություն հայտնելով մրցանակի և ցուցաբերած ուշադրության համար, տիկին Դոնարան Աննա Հակոբյանին ներկայացրել է մանրամասներ 2016 թվականի հուլիսի 26-ի օրվանից, երբ Արթուր Սարգսյանը մեքենայով մտել էր ՊՊԾ գունդ և շենքում գտնվող մարդկանց սնունդ տարել. հենց այդ արարքի համար էլ հասարակությունը նրան անվանել է «Հաց բերող»:
Հիշելով մանրամասնություններ, տիկին Դոնարան շեշտել է, որ իր համար կարևոր է, որպեսզի Հաց բերողի մեքենան վերադարձվի իրենց ընտանիքին:
Զրույցի ընթացքում տիկին Հակոբյանը հետաքրքրվել է նաև տիկին Դոնարայի առողջական խնդիրներով, խոստացել օգնել նրան այդ հարցում:
Հաց բերող Արթուր Սարգսյանին «Հայկական ժամանակ» օրաթերթի «Տիգրան Հայրապետյան»-ի անվան մրցանակը հանձնվել էր ս.թ. մարտի 18-ին. մրցանակը հետմահու հանձնվել է Արթուր Սարգսյանին մարդասիրության և անձնազոհության համար: Իր ելույթում Աննա Հակոբյանը շեշտել էր, որ մրցանակը ևս մեկ առիթ է, գնահատելու և խոնարհվելու Արթուր Սարգսյանի ցուցաբերած բարձր մարդասիրության առաջ:
«Ցանկանում եմ հատուկ շեշտել, որ մրցանակը չունի քաղաքական բաղադրիչ և ընդհակառակը, մրցանակն այն մասին է, որ աշխարհում կան իրավիճակներ, որոնք վեր են քաղաքականությունից»,- ասել էր Աննա Հակոբյանը:
