Մամուլ

Միայն հեղափոխականների վարչապետը չեք, այլև՝ «հակահեղափոխականների». Արփինե Հովհաննիսյան

Միայն հեղափոխականների վարչապետը չեք, այլև՝ «հակահեղափոխականների». Արփինե Հովհաննիսյան

ԱԺ նախկին փոխնախագահ Արփինե Հովհաննիսյանը ֆեյսբուքյան էջում անդրադարձել է պետական ծառայողների օպտիմալացմանը: Գրառումը՝ ստորև․

«Ինչպես և սպասվում էր, երեկ կառավարության հարցուպատասխանին վարչապետ Նիկոլ Փաշինյանը ոչ միայն ներողամտություն չհայցեց ՀՀ այն քաղաքացիներից, որոնց իր կառավարության անդամները պիտակավորել էին որպես հավելյալ արդյունք չստեղծող, այլև այդպես էլ չբացատրեց՝ ինչ է նշանակում «հավելյալ արդյունք»։ Հետևաբար առկախված մնացին հարցերը․

• Ի՞նչ չափանիշների հիման վրա է գնահատվելու հավելյալ արդյունքը։ 

• Ինչ-որ չափանիշ կա՞, որ թույլ կտա որոշել արդյոք վարչապետը, փոխվարչապետերը, նախարարները հավելյալ արդյունք ստեղծո՞ւմ են, թե՞՝ ո՛չ։ 

• Ինչպե՞ս է որոշվելու, օրինակ, հավելյալ արդյունքը պաշտպանության, սոցիալական պաշտպանության ոլորտում։ Ո՞րն է մեթոդաբանությունը։ 

• Ո՞րն է լինելու այն հստակ, կանխատեսելի բանաձևը, որը մինչև «արդյունք չստեղծող» իրավաբանին, հաշվապահին աշխատանքից ազատելը թույլ կտար որոշելու՝ ի վերջո այդ մարդիկ արդյունք ստեղծո՞ւմ են կամ երբևէ ստեղծե՞լ են․․․

Իրավաբանի և հաշվապահի հետ կապված վարչապետի մոտեցումը, բայց, շատ հետաքրքիր էր մեկ այլ տեսանկյունից։ Պարզվում է՝ այս պարագայում հեռացվելու են ոչ թե «հավելյալ արդյունք» չստեղծողները, այլ նրանք, ովքեր իրապես կայացած են։ Վարչապետի հոգատար մոտեցումը այն է, որ քանի որ այդ մարդիկ կայացած պրոֆեսիոնալներ են, ավելի լավ է՝ չծառայեն պետական համակարգում, այլ լավ աշխատանք գտնեն մասնավոր հատվածում, հարստանան և երջանիկ լինեն։ 

Ու քանի որ այս հարցերի պատասխանները վարչապետը չուներ, և ենթադրում եմ, երբևէ չէր էլ ունեցել, նա տվեց իր համար ամենահեշտ պատասխանը, որ խոսքը ոչ թե հավելյալ արդյունք չստեղծողների, այլ ընդհանարապես արդյունք չստեղծողների՝ պարապ-սարապների մասին է։ Ավելին՝ պարզվեց՝ ծայրահեղը միայն տասը հազար քաղաքացիների կրճատումն է, իսկ օրինակ 9000 քաղաքացիների կրճատումը դիտարկվում է մինչև տասը հազարի մեջ և ամենևին սարսափելի չէ։

Երեկվա հարցուպատասխանը հատկանշական էր նաև նրանով, որ վարչապետը բացահայտեց արդյունք չստեղծող մարդկանց որոշելու բանաձևը։ Այն բանաձևը, որը օպտիմալացման թաքնված գաղափարական հիմքն է։

«Արդյունք չստեղծողները» նրանք ենք, ովքեր որևէ կերպ կապված են նախկին իշխանությունների հետ։

Առաջիկայում սա է լինելու այն միակ մեթոդը, որով որոշվելու է հեռացման ենթակա, արդյունք չստեղծող պետական ծառայողը։ Ավելին՝ երեկ վարչապետի մանիպուլյացիաները, հանրապետական անցյալում կրկին մեղավորներ փնտրելը, անհանգստությունն ունեին իրենց հստակ պատճառը` ինքը լավ գիտեր, որ արդեն պաշտոնապես համաձայնել է իր ենթականեր փոխվարչապետի ու ֆինանսների նախարարի հետ, ու դրա հիման վրա տվել է հանձնարարականներ բոլոր պետական կառավարման մարմիններին՝ բոլոր միջոցներով ազատվել անցանկալի պետական ծառայողներից:

Հ.Գ. Երբ ԱԺ ամբիոնից բարձրաձայնում եք խնամի-ծանոթ-բարեկամ թեզը, պետք է հիշել, որ ամփոփելով վերջին տասը ամսվա կադրային քաղաքականությունը, կարելի է ստանալ պետական համակարգում ընդգրկվելու Ձեր հիմնական չափանիշները՝ վարչապետի բարեկամներ, ամենաշատը քայլածներ, ամենաշատը լայքածներ, ամենաշատ հեղափոխության արժեքներին հավատացողներ և Հայոց պետականության ծաղկման վերաբերյալ ամենասիրառատ գրություններ կազմողներ։

Հայհոյողները սրանց մեջ են: Թե՞ կհերքեք, որ պետական ծառայության համակարգում ընդգրկված ԱԺ պատգամավոր եղբորորդիներ, աներձագներ, պատգամավորի աղջկա փոխմարզպետ նշանածներ, Ազգային ժողովի փոխնախագահի ամուսին կադաստրի պետեր, Ազգային ժողովի նախագահի կնոջ ընկերուհիներ ու առաջին տիկնոջ ազգականներ բոլոր հնարավոր պետական կառույցներում չկան։ 

Հ.Գ. Հավելյալ արդյունք չստեղծողների կողքին պետք է հիշել հավելյալ վնաս տվողներին` հայոց պետականությանը և հասարակությանը: Եվ, այստեղ ազնիվ կլինի, ինչպես դուք էիք ասում, սկսեք ձեզնից։

Հ.Գ. Պետական ողջ ռեսուրսի կենտրոնացմամբ հակահեղափոխական պարապ-սարապ փնտրելուց առաջ պետք է հիշել, որ ազդեցությանը միշտ հետևում է հակազդեցությունը։ Եթե հազարավոր պետական ծառայողների համար հասանելի համակարգում շրջանառում ես նրանց վիրավորող գրություն, պետք է նաև սպասես հակազդեցությանը։ Ու եթե այդքան մերժում եք ռեպրեսիաները, ինչո՞ւ եք այդքան փնտրում այն պարապ-սարապին, որը միակ գործը ձեր գրագրության հրապարակումն է։

Ոչ մի պատեհ առիթ բաց չեք թողնում, որ նշեք, թե ինչ թափանցիկ և երկխոսության պատրաստ Կառավարություն եք։ Դուք չեք ապահովում քննարկումների թափանցիկությունը և հրապարակայնությունը, դրա համար պետական ծառայողները են հարկադրված լինում ապահովել գործընթացի թափանցիկությունը։

Հ.Գ.Գ. Ժամանակն է վերջապես հասկանալու, որ Դուք միայն հեղափոխականների վարչապետը չեք, այն նաև «հակահեղափոխականների» վարչապետը։ Դուք պարտավոր եք հոգ տանել Հայաստանի Հանրապետության յուրաքանչյուր քաղաքացու բարեկցության համար»,-եզրափակել է Արփինե Հովհաննիսյանը»։

Ըստ Նիկոլ Փաշինյանի ևս տուժՎում են ՄԻՆՉԵՎ 10000 ՀՀ քաղաքացիներ շահում է հայոց պետականությունըԻնչպես և սպասվում էր,…

Gepostet von Arpine Hovhannisyan am Mittwoch, 6. März 2019
Կիսվել նյութով