Արցախի դեմ ագրեսիայի առաջին տարելիցի օրը Ադրբեջանի նախագահը հերթական սպառնալիքներն է հնչեցրել Հայաստանի հասցեին
Արցախի դեմ ագրեսիայի առաջին տարելիցի օրը Ադրբեջանի նախագահը հերթական սպառնալիքներն է հնչեցրել Հայաստանի հասցեին
Արցախի դեմ լայնածավալ ագրեսիայի առաջին տարելիցի օրը Ադրբեջանի նախագահ Իլհամ Ալիևը հերթական սպառնալիքներն է հնչեցրել Հայաստանի հասցեին։
«Հայկական ֆաշիզմը ոչնչացվել է, բայց դրա դրսեւորումները տեսանելի են: Սա շատ վտանգավոր միտում է առաջին հերթին հայկական պետության համար»,-ասել է նա Ադրբեջանում նշվող հիշատակի օրը ժողովրդին ուղղված իր ուղերձում:
«Ես արդեն ասել եմ, եւ այսօր՝ Հիշատակի օրը, մեր շեհիդների լուսավոր հիշատակի առջեւ եւս մեկ անգամ կասեմ՝ եթե տեսնենք, որ հայկական ֆաշիզմը գլուխ է բարձրացնում, եթե տեսնենք, որ նոր վտանգ կա մեր ժողովրդի եւ պետության համար, ապա առանց վարանելու կկոտրենք հայկական ֆաշիզմի գլուխը:
Թող բոլորը դա իմանան: Թող ոչ ոք չմոռանա, որ պատերազմի եւ Հաղթանակի խորհրդանիշ «Երկաթե բռունցքը» տեղում է»,-հավելել է նա։
Ադրբեջանի ԱԳՆ-ն երկար հայտարարության մեջ ագրեսիան անվանում է «Հայաստանի զինված ուժերի հերթական ռազմական սադրանքի կանխում», որը, իբր, համապատասխանում է միջազգային հումանիտար իրավունքներին, թվարկում է հայկական կողմի ենթադրյալ «հանցագործությունները», հաղորդում ՄԻԵԴ եւ Միջազգային դատարան դիմումների մասին։
Ադրբեջանի ԱԳՆ-ի հայտարարության վերջին մասում ասվում է․ «Ադրբեջանը պատրաստ է կարգավորել Հայաստանի հետ հարաբերությունները՝ միջազգային իրավունքի սկզբունքների պահպանման, մասնավորապես՝ ինքնիշխանության, տարածքային ամբողջականության պահպանման եւ միջազգային սահմանների անխախտելիության հիման վրա։
Հայաստանին կոչ ենք անում հարգել այդ հիմնարար սկզբունքներն ու հետեւել միջազգային պարտավորություններին՝ ի շահ տարածաշրջանի խաղաղության, անվտանգության պահպանման եւ բարգավաճման»։
Հատկանշական է, որ ինքնիշխանության հարգման մասին խոսում է երկիր, որը օկուպացրել է ոչ միայն Արցախի մի մասը, այլ նաեւ ներխուժում է Հայաստանի ինքնիշխան տարածք։
