Աշոտ Ղազարյանի և նրա տիկնոջ Մելանի ոսկե հարսանիքն է
Սիրված դերասան Աշոտ Ղազարյանն ու նրա տիկին Մելանին նշում են ամուսնության 50-ամյակը։ Զույգը ոսկե հարսանիքի տոնակատարությունը կազմակերպել է Կալիֆոռնիայում։
Այս մասին դերասանը տեղեկացրել էր դեռ սեպտեմբերին՝ հրապարակելով հրավերը։ Տոնակատարությունը նշանակված էր հոկտեմբերի 2-ին, երեկոյան ժամը 19։00-ին, Բերբանկ քաղաքի «Arbat Banquet Hall» սրահում (711 S San Fernando Blvd)։ Աշոտ Ղազարյանը սիրով հրավիրել էր մասնակցելու իրենց սիրո տոնին։
«Վերջապես որոշեցինք ամուսնանալ, կգաք չէ՞»
Հումորով հայտնի դերասանը նշանակալի տարեդարձի մասին խոսել է իրեն հատուկ ոճով։ Նա կատակով գրել էր. «Վերջապես որոշեցինք ամուսնանալ, կգաք չէ՞»։ Հիսուն տարվա համատեղ կյանքը պսակող տոնը, սակայն, լուրջ առիթ է. ոսկե հարսանիքը հազվադեպ է պարգևվում զույգերին։ Հրավերի մանրամասները արդեն հրապարակել էինք Bavnews-ում։
Դերասանի մասին
Աշոտ Ղազարյանը ծնվել է Երևանում՝ 1949 թվականի մայիսի 15-ին։ Ավարտել է Երևանի գեղարվեստաթատերական ինստիտուտը, եղել է «Նաիրի» վոկալ-գործիքային անսամբլի գեղարվեստական ղեկավարն ու մենակատարը, դասավանդել է, իսկ 2006 թվականին հիմնել է խոսքի և հումորի դպրոց։
Երկար տարիներ հանդես է գալիս հումորային ծրագրերում և սիրված է հանդիսատեսի շրջանում։ Իր ծննդյան տարեդարձի առիթով դերասանը նշել էր, որ առավել թանկ է համարում հարազատների և մտերիմների ջերմ շրջապատը։
Շնորհավորում ենք Աշոտ Ղազարյանին և նրա տիկնոջը՝ Մելանիին ոսկե հարսանիքի առթիվ և մաղթում առողջություն, սեր ու երկար տարիներ միասին։
