Ամանորի ծախսերի 271 մլն դրամը խորհուրդ կտայի ուղղել Գյումրի, քանի՞ տնակի հարց կլուծվեր․ Թեհմինա Վարդանյան
Ամանորի ծախսերի 271 մլն դրամը խորհուրդ կտայի ուղղել Գյումրի, քանի՞ տնակի հարց կլուծվեր։ Երևանի ավագանու «Լույս» խմբակցության անդամ Թեհմինա Վարդանյանն իր ֆեյսբուքյան էջում գրառում է կատարել՝ անդրադառնալով քաղաքապետարանի ամանորյա ծախսերին։
Գրառումն ամբողջությամբ ներկայանցում ենք ստորև․
«Երեկ ավագանու նիստի ժամանակ խոսեցի կառավարության և քաղաքապետարանի կողմից Հանրապետության հրապարակում անցկացվող միջոցառումներին տրամադրվող ահռելի գումարի՝ շուրջ 321 մլն դրամի մասին։ Ուզում եմ հստակեցնել, որ սրա մեջ ամենեւին չեն մտնում վարչական շրջանների ամանորյա ծախսերը։ Վերջիններս ներառյալ, ընդհանուր գումարը կազմում է շուրջ 550 մլն դրամ։
Կառավարությանը խորհուրդ կտայի պահուստային ֆոնդից տրամադրվող այդ 271 մլն դրամն ուղղել Գյումրի։ Այդ գումարով քանի՞ տնակի հարց կլուծվեր։ Այ դա կլիներ «ամանորյա հրաշք»։ Քաղաքապետարանն էլ կարող էր ընդամենը զուսպ լինել իր ծախսերի մեջ եւ լուծեր բազմաթիվ խնդիրներ, որոնք օրհասական են։ Ամանորը միշտ էլ լավ է անցել Երեւանում։ Պետք չի 1.2 մլն $ ծախսել ու հպարտանալ դրանով։
Այս ամենն ինձ հիշեցնում է հիվանդ մի կնոջ, ում դալուկ դեմքին շպար են քսում ու աչքերը ներկում, բայց ողջ մարմինը քայքայվում է»։
Ավելի ուշ նա հավելել է. «Փաստորեն, իմացանք, որ կառավարությունը 271 մլն գումար պահուստային ֆոնդից տրամադրել է, որ մարդիկ հնարավորություն ունենան վարչապետի հետ մի մեծ ընտանիքի մաս զգալ իրենց։ Ու կոտրեն տարիներով ձեւավորված ուտուշխմուշային կարծրատիպերը։
Շատ զիլ հիմնավորումներ են»:
