ԲՀԿ-ական պատգամավորն ու կողմնակիցները ներխուժել են Մեդիա Կենտրոն՝ փորձելով տապալել դիտորդների ասուլիսը (Տեսանյութ)
Ազգային ժողովի Բարգավաճ Հայաստան կուսակցության պատգամավոր Վահե Էնֆիաջյանը և մի խումբ երիտասարդներ րոպեներ առաջ ներխուժել են Մեդիա կենտրոն՝ փորձելով տապալել «Անկախ դիտորդ» դաշինքի մամուլիս ասուլիսը։ Պատճառը հավանաբար «Անկախ դիտորդ»-ի անդամ Դանիել Իոաննիսյանի հետևյալ գրառումն էր․
«Մենք հավաստի ապացույցներ ենք ձեռք բերել, որ «Բարգավաճ Հայաստանը» հանրահավաքներին մասնակցելու համար մարդկանց ապօրինաբար վճարել է: Ավելին, ԲՀԿ-ի ներկայացուցիչները վախեցնում են մեզ ազդարարողներին։ Մանրամասները՝ ժամը 16:00-ի ասուլիսին, որ տալիս ենք Մեդիա Կենտրոնում»։
Վահե Էնֆիաջյանը հայտարարել է, որ նշված տեղեկատվությունը չի համապատասխանում իրականությանը։ Ցույց տալով իր հետ եկած երիտասարդներին՝ պատգամավորը հարցրեց դիտորդներին՝ նրանց մասի՞ն է խոսք գնում, տարածքում էինք բոլորս, մասնակցել ենք․ «Ո՞նց կարելի է նման բան անել, էս նոր Հայաստանում նոր մոտեցումներ են»։ Ընդհատելով «Անկախ դիտորդ»-ի անդամ Արթուր Սաքունցին ու Դանիել Իոաննիսյանին՝ Էնֆիաջյանն ու իրեն ուղեկցող երիտասարդները գոռգոռացել են դիտորդների վրա․ «Չշշկռե՛ս»։ Պատգամավորը բարձր տոնով կրկնել է իր խոսքը, թե ասուլիս տվողները ապատեղեկատվություն են տարածում։ Արթուր Սաքունցն առաջարկել է ասուլիս տալ ու պաշտոնապես հերքել իրենց։
Պատգամավորի ու դիտորդական կազմակերպության ներկայացուցիչների թեժ զրույցից հետո Վահե Էնջիաջյանը հեռացել է։ Այս պահին ասուլիսն ավարտվել է։ տեսագրությունը կարող եք դիտել ստորև։ Միջադեպը՝ 27-րդ րոպեից։
Աղբյուր՝ forrights.am
