Նոր Նորքում երեխայի են վրաերթի ենթարկել․ ծնողները փնտրում էին նրան

Hraparak-ը գրում է․ Մեր տեղեկություններով, այսօր՝ ժամը 18։00-ի սահմաններում, Երևանի Նոր Նորք վարչական շրջանում տղա երեխայի են վրաերթի ենթարկել։

Ականատեսները շտապօգնություն են կանչել և երեխային տեղափոխել հիվանդանոց։

Դեպքից հետո տարածքում գործող դպրոցների փակ խմբերում տարածում էին երեխայի լուսանկարը՝ փորձելով գտնել նրա ծնողներին ու հարազատներին։

Մեզ հայտնի դարձավ, որ երեխայի ծնողներին արդեն գտել են, և նրանք այս պահին հիվանդանոցում են՝ երեխայի կողքին։

Տղան սովորում է Նոր Նորքի դպրոցներից մեկի 6-րդ դասարանում։ Վրաերթի հետևանքով նա վերջույթի կոտրվածք է ստացել։

Դեպքի մանրամասները ճշտելու նպատակով դիմեցինք ՆԳՆ ոստիկանություն։ Այնտեղից հաստատեցին, որ նման ահազանգ ստացել են՝ նշելով, որ լրացուցիչ տեղեկատվություն կտրամադրեն ավելի ուշ։