Գազայից երեխաներ կտեղափոխվեն Հայաստան

Գազայի հատվածից առողջական լուրջ խնդիրներ ունեցող երեխաներ կտեղափոխվեն Հայաստան, որտեղ նրանց անհրաժեշտ բժշկական օգնությունը կտրամադրվի ՀՀ առողջապահական հաստատություններում։

Երեխաների Հայաստան տեղափոխման և բուժման կազմակերպման նպատակով ՀՀ կառավարության պահուստային ֆոնդից ՀՀ առողջապահության նախարարությանը կհատկացվի 16,7 մլն դրամ։

Ըստ որոշման հիմնավորման՝ ՀՀ առողջապահության նախարարությունը պատրաստակամություն է հայտնել և ներկայում համապատասխան աշխատանքներ է իրականացնում ՀՀ արտաքին գործերի նախարարության և Առողջապահության համաշխարհային կազմակերպության հետ համատեղ։

Նպատակն է Գազայի հատվածից առողջական լուրջ խնդիրներ ունեցող մինչև 10 երեխայի տեղափոխումը Հայաստան և նրանց անհրաժեշտ բժշկական օգնության կազմակերպումը ՀՀ առողջապահական հաստատություններում։

Երեխաների առողջական վիճակի նախնական գնահատման արդյունքում 11 դիտարկված պացիենտներից ընտրվել էր 7-ը, որոնց անհրաժեշտ բուժումը հնարավոր է իրականացնել Հայաստանում։

Սակայն ընտրված 7 ընտանիքներից միայն 3-ն են համաձայնել Հայաստան տեղափոխվելու և այստեղ հյուրընկալվելու պայմանին՝ յուրաքանչյուր երեխայի հետ առավելագույնը մեկ ուղեկցող անձի մասնակցությամբ։