14-ամյա աղջիկը կյանքի գնով փրկել է եղբորը
ԱՄՆ-ի Դետրոյթ քաղաքում 14-ամյա Աամինա Բրեդլին մահացել է՝ փորձելով փրկել ջուրն ընկած իր կրտսեր եղբորը, հայտնում է WXYZ-ը։
Աղջկա հայրը՝ Գլեն Բրեդլին, պատմել է, որ ընտանիքը հանգստանում էր գետի ափին գտնվող զբոսայգում։
Այդ ընթացքում Աամինան և նրա կրտսեր եղբայրը մոտեցել են ջրին։ Երբ երեխան ընկել է գետը, աղջիկն առանց վարանելու նետվել է նրա հետևից՝ օգնության հասնելու նպատակով։
Հոր խոսքով՝ Աամինան լողալ գիտեր, սակայն գետի ուժեղ հոսանքը նրան տարել է։
Գլեն Բրեդլին նույնպես փորձել է փրկել դստերը, սակայն չի կարողացել հասնել նրան։ Այդ ընթացքում դեպքի վայրում գտնվող մարդիկ կարողացել են ջրից դուրս բերել երեխային, իսկ Աամինան անհետացել է ջրի տակ։
«Նրա վերջին խոսքերն էին. «Հայրի՛կ, օգնիր ինձ»», – պատմել է հայրը՝ հավելելով, որ ինքն էլ քիչ էր մնում խեղդվեր և ստիպված էր պայքարել սեփական կյանքը փրկելու համար։
Ընտանիքի անդամների խոսքով՝ Աամինայի մահը ծանր հարված է եղել բոլոր հարազատների համար։
«Բոլորիս սիրտը կոտրված է, բայց փորձում ենք ուժ գտնել այս ծանր կորստից հետո», – ասել է աղջկա հայրը։
