Տղամարդը տնից առևանգել է քնած 5-ամյա երեխային և անտառում սեռական բռնության ենթարկել նրան
Հնդկաստանի Մահարաշտրա նահանգում իրավապահ մարմինները ձերբակալել են մի 25-ամյա տղամարդու, որը կասկածվում է 5-ամյա աղջկա առևանգման և նրա նկատմամբ առանձնակի ծանր հանցագործություն կատարելու մեջ։
Այս մասին տեղեկացնում է «The Times of India» պարբերականը:
Տեղական լրատվամիջոցների փոխանցմամբ՝ միջադեպը տեղի է ունեցել Ռայգադ շրջանում։
Հուլիսի 14-ի վաղ առավոտյան աղջկա ծնողները դիմել են ոստիկանություն՝ հայտնելով, որ երեխան անհետացել է իրենց տնից։
Ահազանգից անմիջապես հետո մեկնարկել են որոնողական աշխատանքներ, որոնց ակտիվորեն մասնակցել են նաև տեղի բնակիչները։
Որոշ ժամանակ անց երեխային հայտնաբերել են անտառային գոտում և անմիջապես տեղափոխել հիվանդանոց, սակայն բժիշկներին, ցավոք, չի հաջողվել փրկել նրա կյանքը։
Ըստ նախնական տվյալների՝ իրավապահները ենթադրում են, որ կասկածյալը երեխային տեղափոխել է անտառային հատված, որտեղ էլ իրագործել է իր հանցավոր արարքը։
Ոստիկաններին հաջողվել է նույնականացնել և գտնել կասկածյալին տեսահսկման խցիկների ձայնագրությունների վերլուծության շնորհիվ։
Հարցաքննության ժամանակ ձերբակալվածը խոստովանել է մեղքը՝ հավելելով, որ ցանկանում էր ինքնակամ ներկայանալ իրավապահներին, սակայն վախեցել է բնակիչների կողմից հնարավոր ինքնադատաստանի ենթարկվելուց։
Դեպքի բոլոր հանգամանքները լիարժեք պարզելու ուղղությամբ քննությունը դեռ շարունակվում է։
