Մեքենան ընկել է ջրանցքը․ երեք դեռահաս զոհվել է
Միլանի շրջանում ինը հոգու տեղափոխող ավտոմեքենան ընկել է ջրանցքը, ինչի հետևանքով զոհվել է երեք դեռահաս։
Ղեկին եղել է Իտալիայի 19-ամյա քաղաքացի, որը, քննության նախնական տվյալների համաձայն, հնարավոր է՝ գտնվել է ալկոհոլի ազդեցության տակ, գրում է Daily Mail-ը։
Վթարը տեղի է ունեցել լուսաբացին՝ Սենագո կոմունայում, երբ «Audi» մակնիշի մեքենան դուրս է եկել ճանապարհից և ընկել Վիլորեզի ջրանցքը։
Վարորդը ներկայումս քննության տակ է՝ ծանրացուցիչ հանգամանքներով անզգուշությամբ սպանության կասկածանքով։
Տեղական լրատվամիջոցների տեղեկություններով՝ կատարված ալկոհոլային թեստը դրական արդյունք է ցույց տվել։
Դեպքի վայր են ժամանել փրկարարները մոտ ժամը 05:30-ին։
Գործողություններին մասնակցել են հրշեջ ծառայությունը, ոստիկանությունն ու ջրասուզակները, որոնք ջրում որոնել են տուժածներին։ Ավելի ուշ մեքենան ջրանցքից դուրս է բերվել կռունկի օգնությամբ։
Զոհվածները 17 տարեկան էին․ երկու տղաների մարմինները հայտնաբերվել են մեքենայի ներսում, իսկ աղջիկը մահացել է հիվանդանոց տեղափոխվելուց հետո։ Մնացած ուղևորները՝ 17-ից 19 տարեկան, ստացել են վնասվածքներ։
Միլանի դատախազությունը նշանակել է զոհվածների մարմինների դատաբժշկական փորձաքննություն, իսկ վթարի հանգամանքների քննությունը շարունակվում է։
