«Սա յազվայություն չէ, պատրաստ եմ Փաշինյանի հետ հանդիպել եթերում». Հրանտ Բագրատյան
«Սա յազվայություն չէ, պատրաստ եմ Փաշինյանի հետ հանդիպել եթերում»։ Այս մասին Ֆեյսբուքյան իր էջում գրել է ՀՀ նախկին վարչապետ, տնտեսագետ Հրանտ Բագրատյանը:
«Իմ կողմից շատ հարգված էկոնոմիկային նախարար Տ.Խաչատրյանը փորձել էր պատասխանել 2 օր առաջ ֆեյսբուքի իմ էջում կատարած վերլուծությանը։
Հիշեցնեմ, այդ ստատուսում ես ասել էի. «Մի շարք ոլորտների վիճակագրությունն ակնհայտորեն կեղծված է։ Այսպես, ՏԱՑ-ն աճել է 7%-ով, իսկ բեռնափոխադրումները պակասել են 54%-ով։ Ընդամենը մեկ տարում տնտեսության բեռնատարությունն իջել է ավելի քան 2 անգամ… Եվս այսպիսի մեկ տարի, և ՀՀ-ն կլինի աշխարհում առաջին պետությունը, որտեղ տրանսպորտ պետք չէ։
Կամ շինարարությունն ավելացել է 4.4%-ով, մինչդեռ ապրանքային բետոնի արտադրությունը պակասել է 12%-ով։ Այսինքն, մեկ տարում միավոր շինարարության բետոնատարությունն իջել է 16.4%-ով։ Ի դեպ, պակասել է էլեկտրաէներգիայի արտադրությունը՝ 3.5%։ Այսինքն, միավոր ՀՆԱ-ի էլեկտրաէներգատարությունը պակասել է 10%-ով։ Չեմ հավատում»։
Պ-ն Խաչատրյանը բեռնափոխադրումների խայտառակ թվերին չէր անդրադարձել։ Բետոնատարության մասով ասել էր, որ այն բացատրվում է ջերմոցների շինարարությամբ։ Եվ նորից կիքս. ամբողջ շինարարության միայն 5%-ն է եղել գյուղատնտեսության ոլորտում։ Եթե մի ֆանտաստիկ հնարքով մտածենք, որ այդտեղ բետոնի ծախսը 0 է, իսկ 2018-ին ընդհանրապես ջերմոց չի կառուցվել (իհարկե, դա այդպես չէ), ապա միավոր շինարարության բետոնատարությունը, միևնույնն է, իջել է 11%-ով։
ՀնԱ-ի էլեկտրաէներգատարության իջեցումն էլ նախարարը բացատրել է Ալավերդում կոմբինատի չաշխատելով։ Բա, պարզվում է Ալավերդին ՀՀ Էլ-էներգիայի 10%-ն էր սպառում։ Իսկ 2019-ին էլէներգիայի սպառման նոր միացումներ չեն եղել։ Ճիշտ կլինի, որ նախարարը թվերով հաստատեր իր ասածը։
Պատասխանն, իհարկե, էլ ավելի ծիծաղելի վիճակի մեջ է դնում կառավարությանն ու վիճակագրությանը։ Իրականում սա յազվայություն չէ , ուզում եմ, որ Նիկոլ Փաշինյանը հասկանա, որ նույնիսկ այդ ողորմելի վիճակագրական թվերը կեղծված են։ Պատրաստ եմ նրա հետ հանդիպել եթերում և այդ ամենը քննարկել։ Ինչպես նաև ցույց տալ, որ եթե անցում չկատարվի ներդրումային քաղաքականությանը, շարունակվի ՍՍ-ի տիգրանսարգսյանական-վաչեգաբրիելյանական-ներսեսյերիցյանական-արթուջավադյանական-վարդանարամյանական և այլոց քաղաքականությունը (իսկ հիմա դա է արվում), ապա կորած ենք»:
