Կինը արդարացվել է նորածնին սպանելու մեջ մեղադրվելուց հետո
Հարավային Կորեայի վերաքննիչ դատարանը արդարացրել է Կվոն ազգանունով կնոջը, որը նախկինում մեղավոր էր ճանաչվել հիվանդանոցում ծնված երեխայի սպանության գործով։ Այդ մասին հայտնում է BBC-ն։
Այս գործը մեծ արձագանք էր առաջացրել հասարակության շրջանում և կրկին ուշադրություն հրավիրել երկրում աբորտների վերաբերյալ հստակ օրենսդրական կարգավորման բացակայության վրա։
Քրեական գործի համաձայն՝ կինը ցանկացել էր ընդհատել 36 շաբաթական հղիությունը։ Մեղադրանքի վարկածով՝ երեխան կեսարյան հատմամբ ծնվել էր կենդանի, այնուհետև սպանվել, իսկ բուժանձնակազմը կեղծել էր բժշկական փաստաթղթերը՝ դեպքը ներկայացնելով որպես հղիության արհեստական ընդհատում։ Մարտին Կվոնը դատապարտվել էր երեք տարվա պայմանական ազատազրկման, մինչդեռ վիրահատությունն իրականացրած բժիշկները ստացել էին ազատազրկման պատիժ։
Սակայն վերաքննիչ դատարանը եկել է այն եզրակացության, որ բավարար ապացույցներ չկան հաստատելու՝ Կվոնը գիտակցել է, որ երեխան կենդանի է ծնվելու, և նրան արդարացրել է։ Միևնույն ժամանակ բժիշկների նկատմամբ սպանության մեղադրանքները պահպանվել են, թեև նրանց նշանակված պատժաչափերը մեղմացվել են։
Դատաքննության ընթացքում բժիշկները խոստովանել էին երեխայի սպանությունը։ Կվոնի պաշտպանական կողմը, իր հերթին, պնդել էր, որ կինը տեղյակ չի եղել երեխայի հետագա սպանության մասին և հավատացել է միջնորդի հավաստիացումներին, թե երեխան մահացած է ծնվելու։
Գործը լայն հանրային ճանաչում ստացավ 2024 թվականին, երբ Կվոնը YouTube-ում հրապարակեց տեսանյութ, որտեղ պատմում էր հղիության 36-րդ շաբաթում աբորտ կատարելու մասին։ Դրանից հետո Հարավային Կորեայի առողջապահության նախարարությունը դիմեց իրավապահ մարմիններին, ինչից հետո սկսվեց քրեական հետաքննությունը։
Այս դատավարությունը դարձավ առաջին դեպքը երկրում, երբ սպանության մեղադրանք առաջադրվեց ոչ միայն ուշ ժամկետում աբորտ պահանջած կնոջ, այլև միջամտությանը մասնակցած բժիշկների նկատմամբ։ Չնայած այս աղմկահարույց գործին՝ Հարավային Կորեայում մինչ օրս չի ընդունվել հստակ օրենք, որը կկարգավորի հղիության ժամկետների և աբորտների հարցերը։
