Տղամարդը ներխուժել է նախկին կնոջ տուն և դանակահարել 5-ամյա որդուն
ԱՄՆ-ի Փայնվիլ քաղաքում 31-ամյա Ջեհազ-Ակիլ Խալիք Էչոլսը մեղադրվում է իր 5-ամյա որդու սպանության մեջ։ Ոստիկանության հաղորդմամբ՝ տղամարդը ներխուժել է նախկին կնոջ բնակարան, դանակահարել երեխային և դեպքի վայրից դիմել փախուստի։
Ավելի ուշ նրան ձերբակալել են Taco Bell արագ սննդի ռեստորանում։
Դեպքը տեղի է ունեցել հինգշաբթի՝ կեսգիշերից քիչ անց, Սաբալ Փոյնթ բնակելի համալիրում։ Ոստիկանները բնակարան ժամանելիս հայտնաբերել են երեխային՝ բազմաթիվ դանակահարված վնասվածքներով։
Իրավապահները նրան տեղում առաջին օգնություն են ցուցաբերել և տեղափոխել հիվանդանոց, սակայն բժիշկները չեն կարողացել փրկել նրա կյանքը։
Երեխայի մայրը հայտնել է, որ տղամարդը կոտրել է բնակարանի դուռը, մտել որդու սենյակ և փակվել ներսում։ Երբ նա լսել է աղմուկը և հասել սենյակ, կասկածյալն արդեն հեռացել էր։
Երեխային մայրը հայտնաբերել է հատակին՝ գլխի, պարանոցի և ձեռքերի շրջանում ծանր վնասվածքներով։ Բնակարանում գտնվող մյուս երեխան չի տուժել։
Ոստիկանությունը կարճ ժամանակ անց հայտնաբերել և ձերբակալել է Էչոլսին մոտակա Taco Bell ռեստորանում։ Դեպքի շարժառիթը դեռևս պարզված չէ։
Իրավապահների տվյալներով՝ Էչոլսը նախկինում ևս ունեցել է իրավական խնդիրներ։ 2020 թվականին նա դատապարտվել էր կնոջ նկատմամբ բռնություն գործադրելու համար։
Բացի այդ, այս տարի նրա դեմ հարուցվել էին ևս երկու քրեական գործ՝ ընտանեկան բռնության և ավտոմեքենայի ապօրինի յուրացման դեպքերով։
Ներկայումս Էչոլսը պահվում է Մեկլենբուրգ շրջանի կալանավայրում՝ առանց գրավի ազատ արձակվելու հնարավորության։ Նրա հաջորդ դատական նիստը նախատեսված է հուլիսի 30-ին։
