Ինչ իրավիճակ է այս պահին Վարդենիսում. «Հրապարակ»
Ինչ իրավիճակ է այս պահին Վարդենիսում
Hraparak.am-ը գրում է․ Գեղարքունիքի բնակավայրերի ուղղությամբ ամբողջ գիշեր ինտենսիվ կրակ է եղել, հիմա կրակի ինտենսիվությունը մի քիչ թուլացել է: Այս մասին «Հրապարակին» հայտնեց Վարդենիսի քաղաքապետի մամուլի քարտուղար Էդգար Պետրոսյանը: Նա ողջ գիշեր հետևել է իրավիճակին և պատասխանեց «Հրապարակի» հարցերին:
Հիմա ի՞նչ տրամադրություններ են Վարդենիսում ու հարակից բնակավայրերում: Խուճապ կա՞:
Այնպես չէ, որ մարդիկ խուճապի մեջ են: Պարզապես այն գյուղերից, որտեղ որ հրետակոծություն է եղել, բնակչությունը տարհանվել է Վարդենիս: Սոթքի վրա դեռ կրակոցներ կան, բայց Նորաբակի, Կութի ուղղությամբ հակառակորդի կրակոցների ինտենսիվությունն ընկել է: Կան կրակոցներ, բայց խուճապային վիճակ չէ:
Կարո՞ղ եք ասել, թշնամին առաջ գնացե՞լ է:
-Սոթքի դիրքերում առաջխաղացում չկա, մնացածը՝ տեղեր կան, որ կապ չունենք: Կոնկրետ տեղեր, որտեղ որ ադրբեջանցիները դիրքային փոփոխություն ունեն, այս պահին եղած մեր տեղեկություններով, չկան:
-Մարդիկ հեռանո՞ւմ են:
-Գիշերը, հենց որ սկսվել է կրակը Սոթքի ու Նորաբակի ուղղությամբ, բնակչության տարհանումը կազմակերպել ենք: Բնակիչները տարհանվել են Վարդենիս քաղաք: Բայց տեղերում խուճապ չկա, մարդիկ ժամանակավոր տեղափոխվել են Մարտունի, Երևան: Դա անվանել փախուստ` չի կարելի:
-Վիրավորների, զոհերի մասին ի՞նչ տվյալներ կարող եք տրամադրել:
-Քաղաքացիական անձանցից ունենք երեք թեթև վիրավորում, զոհեր չունենք: Զինվորականների մասով տվյալներ այս պահին չկան:
Սոթքի դպրոցն ի՞նչ վիճակում է:
Դպրոցը ռմբակոծվել է: Փորձել են նկարել, բայց չի ստացվել:
