Երևանում բախվել են ավտոբուսները. կա վիրավոր
Այսօր՝ մայիսի 31-ին, ավտովթար է տեղի ունեցել Երևանում։
Ժամը 16։25-ի սահմաններում Գարեգն Նժդեհի հրապարակում, Բագրատունյաց 14 շենքի հարևանությամբ բախվել են «Zhongtong» և «Գազել» մակնիշի ավտոբուսները։
Ինչպես հայտնում է ֆոտոլրագրող Գագիկ Շամշյանը, վթարի հետևանքով 1 հոգի տեղափոխվել է հիվանդանոց։
Դեպքի վայր են ժամանել ՀՀ Ներքին գործերի նախարարության ոստիկանության Պարեկային ծառայության Երևան քաղաքի գնդի 3-րդ գումարտակի 1-ին վաշտի պարեկները՝ գումարտակի հրամանատար Արսեն Սարգսյանի, գումարտակի հրամանատարի տեղակալ Դավիթ Հովհաննիսյանի, վաշտի հրամանատար Գևորգ Թորոսյանի գլխավորությամբ։
Տարածքը սահմանազատել են նույն վաշտի պարեկներ Հովհաննես Դողանյանն ու Գոռ Մելիքյանը։
Վթարի մասին ՊԾ Երևան քաղաքի գնդից տեղեկությունը փոխանցել են ՀՀ Քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժին, որտեղից ժամանել է քննչական խումբը՝ օրվա պատասխանատու հերթապահ քննիչի գլխավորությամբ։
Վթարի փաստով քննչական բաժնում նախաձեռնվել է քրեական վարույթ, որտեղ էլ պարզում են վարորդների և վիրավորի ինքնությունը։
Գ․ Շամշյանի տեղեկություններով նշված տրանսպորտային միջոցները հաշվառված են Երևանի քաղաքապետարանի հաշվեկշռում և մեկը սպասարկում է թիվ 15, մյուսը՝ թիվ 42 երթուղին։
