Մահացած ծննդկանի թոքերը դարձել են մանուշակագույն՝ անզգայացման հետևանքով․ նոր մանրամասներ
Երևանի Մարգարյան ծննդատանը 24-ամյա մահացած ծննդկանի ՝ Լուիզա Ավետիսյանի, մահվան մեջ հարազատները մեղադրում են նրա բժիշկ Արմեն Խաչատրյանին և անզգայացումը կատարած անձին։
Լուիզայի քույրը՝ Էլենը, «Հրապարակ»-ին պատմեց․ «Մենք մեղադրում ենք բժիշկներին՝ Արմեն Խաչատրյանին, որի մասնակցությամբ առաջին դժբախտ դեպքը չէ որը տեղի է ունեցել, եւ երկրորդը՝ մեղադրում ենք նարկոզի բժշկին, այդ բժշկական խունտայի միջոցով է այդ ամեն ինչը կազմակերպված եղել։ Մենք մեղադրում ենք բոլորին, որոնք անմիջականորեն պատասխանատու են Լուիզայի մահվան գործում։
Անտարբերության են մատնված եղել, նարկոզը տվել են, բնականաբար, փսխել է, դրա հետեւանքով ասել են՝ անկառավարելի հիվանդ է, եւ նարկոզով քնացրել են։ 220 ճնշում ունեցող հղիին կաթիլային են միացնում, որպեսզի ճնշումը իջնի կամ այլ հաբեր են տալիս, որեւէ բան չեն անում իրենք, նարկոզը տալիս են, խեղդում են։ Կարելի է ասել՝ մահացած վիճակում են երեխային կեսարյան հատման միջոցով հանել, մենք մեղադրում ենք երկուսին։Իրավական դաշտում պետք է պատասխան տան։ Տեղային անզգայացում չի եղել, իրեն միանգամից քնեցրել են եւ իր համար հավերժական քուն է եղել»։
Մահացած ծննդկանի ընտանիքը դատաբժշկական փորձաքննության եզրակացությունը ստացել է, այնտեղ նշված է եղել՝ մանուշակագույն թոքեր են հայտնաբերվել , որը անզգայացման հետևանքով է եղել։
Երեխայի վերաբերյալ էլ Էլենը նշեց, որ դեռ գտնվում է հիվանդանոցում՝ բժիշկների հսկողության տակ։
Նշենք, որ հաղորդման հիման վրա նախապատրաստված նյութերում առերևույթ առկա են ՀՀ քրեական օրենսգրքով նախատեսված հանցագործության հատկանիշներ՝ Ոստիկանությունում հարուցվել է քրեական գործ՝ ՀՀ քրեական օրենսգրքի 130-րդ հոդվածի 2-րդ մասով, որը նախաքննություն կատարելու համար ուղարկվել է ՔԿ ԵՔՔՎ Կենտրոն և Նորք-Մարաշ վարչական շրջանների քննչական բաժին և ընդունվել վարույթ։
Աղբյուր՝ hraparak.am
