4-ամյա երեխան պատահաբար սպանել է զարմիկին՝ մեքենայում եղած զենքով
ԱՄՆ-ի Ֆլորիդա նահանգում ողբերգական դեպք է տեղի ունեցել, որի հետևանքով կյանքից հեռացել է 2-ամյա Բրեյդեն Թենիսոնը։
Տեղական լրատվամիջոցների հաղորդմամբ՝ ընտանիքը Ջորջիա նահանգից մեկնել էր Օռլանդո՝ երեխայի ծննդյան տարեդարձը նշելու նպատակով։
Քաղաք ժամանելուց հետո մեծահասակները կարճ ժամանակով լքել են մեքենան՝ վարձակալած բնակարանի հետ կապված ձևակերպումները կատարելու համար, մինչդեռ երեխաները մնացել են ավտոմեքենայում։
Նախնական տեղեկությունների համաձայն՝ մեքենայում եղել է նաև երեխայի մորը պատկանող հրազենը։ Այդ ընթացքում ընտանիքի 4-ամյա երեխան գտել է այն և, ըստ քննության նախնական վարկածի, պատահաբար կրակել է փոքրիկ եղբոր ուղղությամբ։
Կրակոցի ձայնը լսելուց հետո մեծահասակներն անմիջապես վերադարձել են մեքենայի մոտ և կանչել շտապօգնություն։
Վիրավոր երեխային տեղափոխել են մանկական հիվանդանոց, սակայն բժիշկներին չի հաջողվել փրկել նրա կյանքը։
Դեպքից հետո ընտանիքի անդամներից մեկը ևս բուժօգնություն է ստացել՝ ուժեղ սթրեսի հետևանքով առաջացած առողջական խնդիրների պատճառով։
Հարազատների խոսքով՝ Բրեյդենը կենսուրախ և շփվող երեխա էր, որը շատ էր սիրում ժամանակ անցկացնել ընտանիքի հետ։ Նրանք նշում են, որ տեղի ունեցածը ծանր հարված է դարձել բոլոր հարազատների համար։
Դեպքի ամբողջական հանգամանքները շարունակում են ուսումնասիրվել իրավապահ մարմինների կողմից։
