Նեղ տեղերը նենց էի պոկում, մտնում․․․ 1500 նոր հետևորդ և մինչև 5 տարվա ազատազրկում․ 19-ամյա վարորդը ձերբակալվեց ավտոբուսին բախվելուց 14 օր անց

19-ամյա երիտասարդն, իր բնորոշմամբ, փորձել էր «նվաստացնել» դիմացի մեքենայի վարորդին՝ մեծ արագությամբ առաջ անցնելով նրանից, բայց բախվել է երթուղային ավտոբուսին: Երեք մարդ տեղափոխվել էր հիվանդանոց:

Երևանում խոշոր ավտովթարի ենթադրյալ պատճառ դարձած այս վարորդի մեքենա վարելու իրավունքը կասեցված է եղել: Դեպքից հետո նա գնացել տուն ու նոր տեսանյութ է հրապարակել, որտեղ քմծիծաղով հետևում է իր մասնակցությամբ վթարի մասին պատմող Գագիկ Շամշյանի ռեպորտաժին։

Թեև ոստիկանությունը Քննչական կոմիտե հենց նույն օրը՝ ապրիլի 23-ին ու նաև երեկ էր հաղորդում ներկայացրել, կոմիտեում էլ կրկին նույն օրը քրեական վարույթ էր հարուցվել, այդուհանդերձ երիտասարդը ձերբակալվեց դեպքից միայն 14 օր անց՝ այսօր, այն բանից հետո, երբ իր իսկ նկարահանած տեսանյութը մաս-մաս սկսեց տարածվել համացանցում ու մեծ աղմուկ բարձրացավ:

Այսօր դատախազը հանրային քրեական հետապնդում է հարուցել միանգամից երեք հոդվածով՝ ճանապարհային երթևեկության կանոնների խախտման, խուլիգանության և առանց իրավունքի տրանսպորտային միջոց վարելու համար: Այս հոդվածներով առավելագույն պատիժը՝ մինչև 5 տարի ազատազրկումն է:

Վթարից հետո նկարահանած տեսանյութում երիտասարդը մեկումեջ նաև ընդունում էր իր սխալը, բայց հետո՝ հպարտանում, որ միայն ինքը կարող էր նեղ հատվածները ճեղքելով վարել:

Շուրջ 28 հազար հետևորդ ունեցող յութուբյան ալիքում 19-ամյա վարորդը նկարահանում է տարբեր մեքենաներ՝ պատմելով դրանց հզորության մասին, և պարբերաբար դրանք վարում նաև մեծ արագությամբ։ Վերջին մեկ օրվա ընթացքում նրա էջի հետևորդների թիվը ավելացել է շուրջ 1500-ով, իսկ հրապարակված 25 տեսանյութերից 18-ը այսօր արդեն հեռացված էր:

Այս 14 օրերի ընթացքում Քննչական կոմիտեն երիտասարդի նկատմամբ խափանման որևէ միջոց չէր ընտրել, գործը գտնվում էր նախաքննության փուլում, նշանակվել էր փորձաքննություն։ Համացանցի օգտատերերին, սակայն, հիմնականում հետաքրքրում էր՝ ինչո՞ւ է նա ազատության մեջ։

Այս վթարից հետո սոցիալական ցանցերում և Երևանի փողոցներում հարցում արեցինք, պարզելու, թե ի՞նչ վիճակում է մայրաքաղաքում երթևեկությունը։ Ֆեյսբուքյան օգտատերերը գրեթե միաձայն նշել են հիմնական խնդիրները՝ առանց ամրագոտու մեքենա վարելը, իրար չզիջելը, առանց ամրագոտու կամ հատուկ նստատեղի երեխաների տեղափոխումը, հեռախոսը ձեռքին մեքենա վարելը, արագության գերազանցումը և այլն։ Երևանի բանուկ հատվածներում մեզ հանդիպած քաղաքացիների պատասխանները շատ չէին տարբերվում, բայց նրանք նաև պատճառներն էին նշում:

«Հիմնականում անգրագետ են, երթևեկության կանոններին չեն տիրապետում», – ասաց հարցվածներից մեկը:

Մեկ այլ քաղաքացի էլ նշեց. «Մեր ճանապարհները նեղ են, քանդած են, որ էդ քանդած ճանապարհները վերանորոգեն, հաստատ մեկը մյուսին չեն խանգարի, էս փոսից փախցնում ես՝ էն փոսն է, էն փոսից փախցնում ես՝ էն փոսն է»:

Տեսանյութը ստորև․