Մեծահոգի ու բարեսիրտ տիկինը՝ այսօր կդառնար 61 տարեկան. Սերժ Սարգսյանը լուսանկար է հրապարակել

Մեծահոգի ու բարեսիրտ տիկինը՝ այսօր կդառնար 61 տարեկան. Սերժ Սարգսյանը լուսանկար է հրապարակել

Այսօր ՀՀ նախկին առաջին տիկնոջ՝ Ռիտա Սարգսյանի ծննդյան օրն է։ Ռիտա Ալեքսանդրի Սարգսյանը ծնվել է 1962թ․ մարտի 6-ին Ստեփանակերտում։

Ավարտել է Ստեփանակերտի Ալեքսանդր Գրիբոյեդովի անվան 3-րդ միջնակարգ դպրոցը՝ ստանալով երաժշտական կրթություն։

Որոշ ժամանակ աշխատել է մանկապարտեզում որպես երաժշտության ուսուցչուհի։ Ստեփանակերտից Երևան տեղափոխվելուց հետո չի աշխատել։

Ռիտա Սարգսյանը եղել է «Նվիրիր կյանք» արյան քաղցկեղ և այլ ծանր հիվանդություններ ունեցող երեխաների բարեգործական հիմնադրամի հոգաբարձուների խորհրդի նախագահը:

Առաջին տիկնոջ հովանու ներքո անցկացվել են Արամ Խաչատրյանի անվան միջազգային մի շարք մրցույթներ, «Վերադարձ» միջազգային մրցույթ-փառատոնը, «Վերածնունդ» դասական երաժշտության փառատոնը, Հայաստանի պետական ֆիլհարմոնիկ նվագախմբի Երևանյան միջազգային փառատոնը, «Նոր անուններ» մանկական միջազգային մրցույթ-փառատոնը, «ԱրմՄոնո» թատերական միջազգային փառատոնը, «Թումանյանական հեքիաթի օր» տիկնիկային միջազգային փառատոնը և բազմաթիվ այլ միջոցառումներ:

2011 թվականին Ռիտա Սարգսյանի նախաձեռնությամբ ստեղծվել է «Արագիլ» հիմնադրամը՝ նպատակ ունենալով աջակցել սոցիալապես անապահով զույգերին՝ արհեստական բեղմնավորման միջոցով երեխա ունենալ:

Ռիտա Սարգսյանի ջանքերով 2012 թվականի ապրիլի 2-ին ստեղծվել է «Աուտիզմ» ազգային հիմնադրամը:

Հիշեցնենք, որ տիկին Սարգսյանը մահացել է 2020 թվականի նոյեմբերի 20-ին, կորոնավիրուսից։