Մամուլ

Քաղաքացիական ավիացիան խորհուրդ է տալիս ավիաընկերություններին շրջանցել Իրաքի և Իրանի օդային տարածքով թռիչքուղիները

Քաղաքացիական ավիացիան խորհուրդ է տալիս ավիաընկերություններին շրջանցել Իրաքի և Իրանի օդային տարածքով թռիչքուղիները։

Այս մասին Bavnews.am-ը տեղեկացավ Քաղաքացիական ավիացիայի կոմիտեյի ֆեյսբուքյան էջից։

Հաղորդագրության մեջ մասնավորապես նշված է՝

«Հարգելի քաղաքացիներ,

Ինչպես տեղեկացրել էինք, Քաղաքացիական ավիացիայի կոմիտեն շարունակում է​ հետևել Մերձավոր Արևելքում իրադարձությունների զարգացմանը՝ այդ թվում սույն թվականի հունվարի 8-ին Թեհրանում կործանված «Ուկրաինայի միջազգային ավիաուղիներ» ավիաընկերության Boeing-737 օդանավի ողբերգական վթարի հետ կապված նոր հանգամանքներին։

Քաղաքացիական ավիացիայի կոմիտեն սերտորեն համագործակցում է Իրանի Իսլամական Հանրապետության ավիացիոն իշխանությունների,​ Միջազգային քաղաքացիական ավիացիոն կազմակերպությունների,​ Եվրոպական Միության թռիչքային անվտանգության ռիսկերի գնահատման խմբի և իր բոլոր գործընկերների հետ թռիչքների անվտանգ ապահովման նպատակով։

Հաշվի առնելով ստեղծված իրավիճակը՝ Քաղաքացիական ավիացիայի կոմիտեն խորհուրդ է տալիս Հայաստանի Հանրապետությունում գրանցված ավիաընկերություններին​ հաշվի առնել​ Եվրոպական Միության թռիչքային անվտանգության ռիսկերի գնահատման խմբի​ խորհուրդը​ և​ դիտարկել Իրաքի և Իսլամական Հանրապետության օդային տարածքները բոլոր բարձրությունների վրա​ ժամանակավորապես շրջանցելու հնարավորությունը։

Լրացուցիչ տեղեկատվության դեպքում այն կտրամադրվի ՀՀ գրանցված ավիաընկերություններին և հանրությանը:

Հարգանքով՝ Քաղաքացիական ավիացիայի կոմիտե»։

Կիսվել նյութով