Հավաքների մասնակիցները վարժանքներից հետո կանցնեն մարտական հերթապահության․ ովքեր են մասնակցելու դրանց
Հավաքների մասնակիցները վարժանքներից հետո կանցնեն մարտական հերթապահության․ ովքեր են մասնակցելու դրանց
Hraparak.am-ը գրում է․ Երեկ հայտնի դարձավ, որ ՀՀ պաշտպանության նախարարության առաջարկած նախագծի հիման վրա ՀՀ կառավարությունը որոշում է ընդունել հերթական պլանային վարժական հավաքներ հայտարարելու մասին:
Համաձայն այդ որոշման` հերթական պլանային հավաքներին ներգրավվելու են պահեստազորայիններ՝ համազորային և հրթիռահրետանային մասնագիտություններով: Վարժական հավաքներն անցկացվելու են մինչև նոյեմբերի 22-ը:
Մենք տեղեկացանք, որ այսօրվանից արդեն զինկոմիսարիատները սկսել են ծանուցագրեր ուղարկել հստակ հասցեներով, ինչը անհանգստության ալիք է բարձրացրել բնակչության շրջանում:
Վերջին օրերի գրանցված զոհերի ֆոնին բնական անհանգստություն է տիրում հատկապես այն ծնողների շրջանում, որոնք ունեն զորակոչի ենթակա զավակներ:
Նրանց անհանգստացնում է հատկապես այն, թե արդյոք վարժանքների մասնակցության համար զորակոչվածները անցնելո՞ւ են մարտական հերթապահություն կամ հնարավոր հարձակման դեպքում մասնակցելո՞ւ են, արդյոք, մարտական գործողություններին:
Hraparak.am-ն այս հարցով դիմեց պաշտպանության նախարարություն: ՊՆ մամուլի խոսնակ Արամ Թորոսյանը մեզ հետ զրույցում ասաց հետևյալը. «Վարժական հավաքներին ներգրավվելուց հետո նշանակվում են համապատասխան զինվորական հաստիքներում, անցնում մարտական ներդաշնակում և ընդգրկվում մարտական հերթապահությունում»:
Ըստ Արամ Թորոսյանի` սա նշանակում է, որ այս ծանուցագրերով հավաքների մասնակիցները լիարժեք զինծառայողի կարգավիճակ են ստանում:
«Այսինքնստացավ ծանուցագիրը, ներգրավվում է վարժական հավաքի, նշանակվում զինվորական հաստիքի, անցնում պարտական պատրաստության պլանով դասընթացներ, մարտական ներդաշնակում և ընդգրկվում մարտական հերթապահությունում»,-ասաց նա հիշեցնելով, որ հավաքներից խուսափելն առաջացնում է քրեաիրավական պատասխանատվություն:
