Անցած գիշեր Սանկտ Պետերբուրգի՝ Wildberries-ի պահեստները ենթարկվել են հարձակման. ի՞նչ է հայտնի այս պահին
Անցած գիշեր ուկրաինական ԱԹՍ-ները հարվածներ են հասցրել Wildberries-ի նոր լոգիստիկ պահեստներին։ Ընկերության հիմնադիր Տատյանա Կիմը մեկնաբանել է Շուշարայում, Ուտկինայի Զավոդում (Սանկտ Պետերբուրգ և Լենինգրադի մարզ) և Սիմֆերոպոլում գտնվող լոգիստիկ համալիրների վրա իրականացված հարձակումների հետևանքները։
Նրա փոխանցմամբ՝ հաջողվել է պահպանել ինչպես պահեստների տարածքների, այնպես էլ այնտեղ պահվող ապրանքների զգալի մասը։ Բոլոր համալիրներում կազմակերպվել է աշխատակիցների անհապաղ տարհանում, իսկ նախնական տվյալներով՝ զոհեր և տուժածներ չկան։
«Շնորհակալ եմ մեր աշխատակիցներին, մեր հերոսներին։ Մենք մշտապես մեծ ուշադրություն ենք դարձնում անվտանգության միջոցառումներին, և այսօր դա իր արդյունքը տվեց։ Համապատասխան ծառայությունների հետ համատեղ շարունակում ենք աշխատել հետևանքների վերացման ուղղությամբ», – նշել է Տատյանա Կիմը։
Wildberries-ից հայտնել են, որ վաճառողների համար օպերատիվ տեղեկատվությունը հասանելի է նրանց անձնական օգտահաշիվներում։ Բացի այդ, ընկերությունը շարունակում է ապրանքների վերաբաշխումը տարբեր պահեստների միջև՝ ապահովելու դրանց անխափան շրջանառությունն ու գործընկերների բիզնեսի կայուն գործունեությունը։
Ավելի վաղ Տատյանա Կիմը տեղեկացրել էր նաև, որ մեկնարկել են Մոսկվայի մարզի Էլեկտրոստալի լոգիստիկ համալիրում տեղի ունեցած միջադեպի հետևանքով վնասված ապրանքների սեփականատեր վաճառողներին առաջին փոխհատուցումների վճարումները։
Նրա խոսքով՝ առաջին հերթին աջակցություն կստանան առավել փոքր և խոցելի բիզնեսները, որոնց թիվը գերազանցում է 88 հազարը։ Վճարված միջոցները վաճառողների անձնական հաշիվներին կփոխանցվեն 24 ժամվա ընթացքում։
