Դուք այլևս չեք կարող չտեսնելու տալ այն խայտառակ վատ մթնոլորտը, որը տիրում է հայ հասարակության մեջ․ Ռուբեն Մխիթարյանի բաց նամակը
Դուք այլևս չեք կարող չտեսնելու տալ այն խայտառակ վատ մթնոլորտը, որը տիրում է հայ հասարակության մեջ․ Ռուբեն Մխիթարյանի բաց նամակը
Պրոդյուսեր Ռուբեն Մխիթարյանը իր ֆեյսբուքյան էջում գրառում է կատարել, որում բաց նամակ է հղել ՀՀ վարչապետ Նիկոլ Փաշինյանին, ՀՀ նախագահ Արմեն Սարգսյանին և Ամենայն հայոց Կաթողիկոս Ն.Ս.Օ.Տ.Տ Գարեգին Բ-ին։
Նամակը ստորև՝
«Հարգելի պարոնայք, Վեհափառ Տեր:
Դուք այլևս չեք կարող չտեսնելու տալ այն խայտառակ վատ մթնոլորտը, որը տիրում է հայ հասարակության մեջ:
Դուք իրավունք չունեք անտարբերության մատնելու այն ատելության էներգիան, որը ծնել ու սնել եք մեզանում նաև Ձեր «դիտորդի» կարգավիճակով և որը ոչնչացնում է ցանկացած մարդկային ու ազգային արժեք՝ ընտանիքից մինչև ընկերություն:
Դուք պարտավոր եք դադարեցնել և կանգնեցնել անբարոյականության, պատվազրկության և կեղծիքի, հայը հայի դեմ հանելու պետության ներսից և արտաքին ուժերի կողմից ուղղորդվող ազգակործան ծրագիրը, որի պտուղներին մենք ամեն օր ականատես ենք լինում՝ թե համացանցում, թե իրական կյանքում:
Այսպես այլևս անհնար է:
Այսպես շարունակվել չի կարող:
Հանդիպում կազմակերպեք ԱԺ բոլոր ֆրակցիաների ղեկավարների հետ, միասնական կոչի տեքստ պատրաստեք և դիմեք ժողովրդին:
Վերադարձրեք մարդկանց կյանքի բնականոն և ստեղծարար հուն:
Միջոցներ ձեռք առեք սաստելու, պատժելու և կանխարգելելու ատելության ցանկացած դրսևորում, որի զոհը, ի դեպ՝ թե բարոյական և թե ֆիզիկական առումով կարող է դառնալ թեկուզ մեկ հայ, կամ հայաստանցի:
Դիմում եմ Ձեզ հույս ունենալով, որ չեմ լսի Ձեր ենթակայության տակ գտնվող ինչ-որ բաժնի կամ անձի «պատասխանը կամ արձագանքը», քանի-որ երբ իրենք են որոշում պատասխանել, հետո նոր «բոլոլա» են ստեղծում ու ջնջվում են սոցիալական ցանցերից:
Փաստերը շատ են:
Հարգելի պարոնայք, Վեհափառ Տեր:
Խնդրում եմ մի վատնեք մեր, որպես քաղաքացիներ պետական ինստիտուտների ղեկավարների և պետական կրոնի առաջնորդի հանդեպ ունեցած վստահության չափաբաժինը:
Արթնացե՜ք:
ՀՀ քաղաքացի Ռուբեն Մխիթարյան:
Հ.Գ. Պարոնայք, հավատացնում եմ Ձեզ, որ եթե միջոցներ ձեռք չառնեք, ցրողական պատասխաններ տաք Ձեր պատգամավորների և ենթակա մամուլի էջերով, ապա ինքս եմ լուծելու էս հարցը՝ ընկերներիս, համախոհներիս ու հայրենակիցներիս հետ:
Իսկ թե ինչպե՞ս, արդեն այդ ժամանակ Դուք իրոք ի պաշտոնե կլինեք ԴԻՏՈՐԴ»:
