Հայոց ցեղասպանության մասին Էրդողանի խոսքերն «ամոթալի» են համարել Թուրքիայում
Հայոց ցեղասպանության մասին Էրդողանի խոսքերն «ամոթալի» են համարել Թուրքիայում
Թուրք քաղաքագետ Ջեյլան Օզգյուլը հարցազրույց է տվել ռուսական «360» հեռուստաալիքին։ Նա ամոթալի է համարել Էրդողանի Հայոց ցեղասպանության մասին այն կարծիքը, թե պետք է հավասարության նշան դնել 1915 թվականի՝ Օսմանյան կայսրության ոճրագործության և ԱՄՆ-ի կողմից հնդկացիների ոչնչացման միջև, հայտնում է Rusarminfo-ն:
Նա նշել է, որ ի տարբերություն Անկարայի, որը խուսափում է ոճրագործության մասին քննարկումներից, Սպիտակ տունը հրապարակավ բարձրացրել է բնիկ ամերիկացիների ցեղասպանության հարցը, ներողություն է խնդրել և փոխհատուցել իր արարքների համար։
Բացի դրանից, Օզգյուլի խոսքերով, Ամերիկայում հնդկացիների խոշոր համայնքներ չեն մնացել, որոնք մշտապես կարող են բարձրաձայնել իրենց խնդրի մասին։
Քաղաքագետը նշել է, որ հայկական սփյուռքը անհամեմատ մեծ է։ Մասնավորապես, Հայաստանում ապրում է ավելի քան 3 միլիոն մարդ, և ամբողջ աշխարհում ցրված են հայ էթնիկ խմբի շուրջ 10 միլիոն ներկայացուցիչներ:
«Դրա համար սա Թուրքիայի պատմության մեջ նախագահի ամենաամոթալի արարքներից մեկն է»,- ասել է Օզգյուլը։
Հիշեցնենք, որ ավելի վաղ ԱՄՆ Սենատը միաձայն ճանաչեց Հայոց ցեղասպանությունը։ Դա դուր չեկավ Թուրքիայի նախագահ Ռեջեփ Էրդողանին։ Նա էլ իր հերթին սպառնալիքներ հնչեցրեց ԱՄՆ-ի հասցեին, ինչը մեծ աղմուկ բարձրացրեց Թուրքիայում։
