Հայաստանը գտնվելու է Իրաքից ներթափանցող տաք օդային հոսանքների գոտում. օդի ջերմաստիճանը կհասնի +22 աստիճանի
Երեկ երեկոյան օդերևութաբան Գագիկ Սուրենյանը ֆեյսբուքյան իր էջում հայ օգտատերերին խոստացավ, որ առավոտյան գործի գնալուն պես, լավ լուր է հայտնելու։ Դժվար չէր կռահել, որ խոսքը բարենպաստ եղանակների մասին է լինելու։ Այսօր առավոտյան Սուրենյանը տեղեկացրերց, որ ապրիլի 24-ից սկսած Հայաստանը գտնվելու է Իրաքից ներթափանցող արևադարձային տաք օդային հոսանքների ազդեցության գոտում։
Օդի ջերմաստիճանը ապրիլի 24-27-ին հանրապետության ողջ տարածքում այսօրվա հետ համեմատած ցերեկային ժամերին աստիճանաբար կբարձրանա 10-12 աստիճանով։
Օր-օրի տաքանալով 2-3 աստիճանով՝ արդեն ապրիլի 27-ին լեռնային բնակավայրերում ցերեկային ժամերին օդի ջերմաստիճանը կհասնի +13․․․+16, նախալեռնային բնակավայրերում՝ +18․․․+20, հովտային բնակավայրերում՝ +20․․․+22 աստիճանի։
Երևանում նույնպես այսօր ցերեկվա +8․․․+10 աստիճանին ապրիլի 27-ին կփոխարինի +20․․․+22 աստիճան տաքը։
Ապրիլի 22-ին տեղումները շրջանների մեծ մասում կշարունակվեն, լեռնային մարզերում, Լոռիում, Տավուշում, Սյունիքում և Արցախում կտեղա ձյուն, այսօր կշարունակվեն նաև ուժեղ քամիները, առանձին վայրերում քամու արագությունը կհասնի 15-20 մ/վրկ։
Ապրիլի 23-24-ին ցիկլոնը կսկսի թուլանալ, և տեղումները կլինեն առանձին հատվածներում և շատ կարճատև, իսկ ապրիլի 25-27-ին հանրապետության ողջ տարածքում սպասվում է առանց տեղումների եղանակ։
