Ազնիվ մարդկանց թիմով կմասնակցենք խորհրդարանական ընտրություններին. Լյովա Խաչատրյանը և Վահան Կարապետյանը դուրս են եկել ԲՀԿ-ից
«ԲՀԿ» կուսակցության անդամ Լյովա Խաչատրյանը և Վահան Կարապետյանը դուրս են եկել «Բարգավաճ Հայաստան» կուսակցությունից: Այս մասին ասաց Լյովա Խաչատրյանը: Նա նշեց, որ շատ հնարավոր է՝ ազնիվ մարդկանց թիմով մասնակցեն խորհրդարանական ընտրություններին: «Ծիծաղելով, ուրախանալով որոշեցի դուրս գալ, որովհետև այլ ռակուրսով եմ նայում այսօրվա երևույթներին»,- ասաց նա:
-Պարո՛ն Խաչատրյան, դո՞ւրս եք եկել ԲՀԿ-ից և ի՞նչ պատճառով։
– Դուրս եմ եկել ու վերջ: Ցանկություն ունեմ առանձին գնալ…
– Հնարավո՞ր է՝ կուսակցություն ստեղծեք։
– Շատ հնարավոր է՝ ազնիվ մարդկանց թիմով մասնակցենք խորհրդարանական ընտրություններին:
– Իսկ ԲՀԿ-ի ներսի մարդկանց ազնիվ չէ՞իք համարում։
– Ես ուզում եմ ամբողջական ազնիվ մարդկանց թիմով մասնակցել:
– ԲՀԿ-ի մեջ ի՞նչն էր խնդիրը:
– ԲՀԿ-ի մասին խոսել չեմ ցանկանում, և սիրուն էլ չի լինի իմ կողմից խոսել մի թիմի մասին, որի կազմում եղել եմ։
– Կուսակցությունում Ձեր դուրս գալու լուրը ինչպե՞ս է ընդունվել:
– Նորմալ երևի, չգիտեմ։
– Վահան Կարապետյանը և՞ս դուրս է եկել, համատե՞ղ եք կուսակցություն ստեղծելու: (Վահան Կարապետյանի հետ կապ հաստատել չհաջողվեց–խմբ.)
– Մենք միասին ենք բոլոր գործերում, միասին ենք մտածում քաղաքական շատ գործընթացների և երևույթների մասին, մենք գաղափարակիցներ ենք, իսկ կստեղծենք, թե չենք ստեղծի, ցույց կտա ժամանակը:
– Ինչպե՞ս եք պատկերացնում ձեր մասնակցությունը ընտրություններին:
– Ինձ ամբողջությամբ բավարարում է այս վիճակը, բայց կցանկանայի մասնակցել խորհրդարանական ընտրություններին, եթե մի փոքր կասկած ունենամ, որ այն 30 տոկոս քվոտայում, որ տալիս է Սահմանադրությունը՝ պարտադիր խորհրդարան անցնելու համար, կհայտնվեն նախկին թալանչիները, կոռուպցիոներները, մարդասպանները և այլն: Եթե համոզված լինեմ, որ նրանք շանս չունեն այդ 30 տոկոսում հայտնվելու, միգուցե ո՛չ առաջադրվեմ, ո՛չ մասնակցեմ, ո՛չ էլ կուսակցական «խաղեր տամ», քանի որ կուսակցություն հասկացություն առայժմ չկա:
– Որ նշում եք թալանչիներ և այլն, նկատի ունեք նաև ԲՀԿ-ի՞ն:
– Ես բացարձակ ոչ մի կուսակցության առանձին վերցրած նկատի չունեմ, իսկ թալանչիներին, կոռուպցիոներներին և մնացած ոչ մաքուր հայերին բոլորս գիտենք: Ես անձերին նկատի ունեմ, որոնք այստեղ–այնտեղ սողոսկելով հայտնվում էին և՛ խորհրդարանում, և՛ կառավարությունում, և՛ իրավապահ մարմիններում։
– Գագիկ Ծառուկյանի հետ ինչպիսի՞ հարաբերություն ունեք:
– Իմ հարաբերությունները Հայաստանում բոլորի հետ նորմալ են, ես ոչ մի անձնական շահ չեմ հետապնդել:
– Ինչպե՞ս որոշեցիք դուրս գալ, ինչի՞ց ելնելով:
– Ծիծաղելով, ուրախանալով որոշեցի դուրս գալ, որովհետև այլ ռակուրսով եմ նայում այսօրվա երևույթներին
– Աջակցո՞ւմ եք Նիկոլ Փաշինյանին:
– Այո, աջակցում և աջակցելու եմ նրա բոլոր նախաձեռնություններին մինչև խորհրդարանական ընտրություններ, մինչև դրանցից հետո ձևավորվող նոր կառավարության հարյուր օրվա հաշվետվությունը:
Աղբյուր՝ tert.am
