Գայլի գանգն ու ոսկորները փորձել են գաղտնի դուրս բերել երկրից

Ռուսաստանի դաշնային մաքսային ծառայությունը հայտնել է, որ Զաբայկալսկի սահմանային անցակետում կանխվել է գայլի գանգի և ծնոտի ոսկորների ապօրինի տեղափոխման փորձը դեպի Չինաստան։

Գերատեսչության փոխանցմամբ՝ մաքսային հսկողության ընթացքում արտասահմանցի բեռնատարի վարորդի ուսապարկում հայտնաբերվել են գայլի գանգը, ինչպես նաև դրա վերին և ստորին ծնոտների ոսկորները։

Վարորդը հայտնել է, որ մնացորդները ձեռք է բերել Իրկուտսկում և համոզված է եղել, որ դրանք պատկանում են շանը։

Նրա խոսքով՝ ինքը տեղյակ չի եղել, որ նման առարկաների արտահանման համար անհրաժեշտ է համապատասխան հայտարարագրում և թույլտվություն։

Սակայն անցկացված փորձաքննությունը ցույց է տվել, որ առգրավված ոսկրային մնացորդները պատկանում են շնազգիների ընտանիքի ներկայացուցիչ գորշ գայլին (Canis lupus)։

Փաստի առթիվ հարուցվել է քրեական գործ՝ արտահանման կարգի և սահմանված սահմանափակումների խախտման հատկանիշներով։