Հրդեհ գիշերօթիկ դպրոցում. 16 աշակերտ է զոհվել
Քենիայի մայրաքաղաք Նայրոբիից շուրջ 120 կմ հյուսիս-արևմուտք գտնվող Գիլգիլ քաղաքի գիշերօթիկ դպրոցում տեղի ունեցած հրդեհի հետևանքով զոհվել է 16 աշակերտ, հաղորդում է BBC News-ը։
Դեպքի հետևանքով տասնյակ երեխաներ մարմնական վնասվածքներ են ստացել և տեղափոխվել բուժհաստատություններ։
Քենիայի կրթության նախարար Ջուլիուս Օգամբայի խոսքով՝ 71 աշակերտ արդեն դուրս է գրվել հիվանդանոցից, իսկ յոթը շարունակում են բուժում ստանալ։
Նախարարը նշել է, որ հրդեհի առաջացման պատճառները դեռևս հայտնի չեն․ իրավապահ մարմինները շարունակում են հետաքննությունը։
Հրդեհը բռնկվել է հինգշաբթի վաղ առավոտյան «Ուտումիսի» կանանց ակադեմիայում, այն պահին, երբ աշակերտուհիները քնած էին։
Ըստ պաշտոնական տվյալների՝ կրակը սկսվել է հանրակացարանի առաջին հարկում և կարճ ժամանակում ամբողջությամբ պատել շենքը։
Ոստիկանության տեղեկություններով՝ հրդեհը սկսվել է տեղական ժամանակով մոտ ժամը 01:00-ին և ընդգրկել հանրակացարանը, որտեղ բնակվում էր շուրջ 220 աշակերտ։ Ողբերգության պահին դպրոցում եղել է ավելի քան 800 երեխա։
