Արջերը մտել են Աշտարակի գյուղերից մեկը, 2 ոչխար կերել
Արջերը մտել են Արագածոտնի մարզի Աշտարակ խոշորացված համայնքի Օրգով գյուղ և վնասներ պատճառել բնակիչներին։ Այս մասին Oragir.News-ի հետ զրույցում հայտնեց Օրգովի հարևան գյուղի՝ Աղձքի բնակիչներից մեկը։
«Նման դեպք տարիներ առաջ էլ է եղել, որ արջը մտել է Օրգով, բայց նման վնասներ չէր տվել։ Այս անգամ մարդկանց ցանկապատները կոտրել է, դրսում դրված խնձորի արկղերը շուռ է տվել ու կերել, և որ ամենասարսափելին է՝ կենդանիներ է կերել։ Գյուղացիներից մեկը 2 ոչխար էր առել, որ առավոտյան մորթեր, ղավուրմա պատրաստեր, արջը 2 ոչխարին էլ կերել է»,- ասաց բնակիչը։
Նրա խոսքով՝ Օրգովը շատ մոտ է Աղձքին և ամեն պահ կարող են արջերը ձորի միջով իջնել իրենց գյուղ։
«Մարդիկ կան, որ վախենում են ուշ ժամի իջնել բակ, մտածում են՝ արջերը կարող են հարձակվել իրենց վրա»,- ասաց նա։
Հարցին՝ որևէ մեկն անձամբ տեսե՞լ է արջերին, թե՞ ենթադրություններ են, մեր զրուցակիցը պատասխանեց․
«Բնակիչներից մեկը տեսել է։ Բացի այդ՝ որտեղ գնացել է, կեղտոտել է, կեղտից ևս հասկանալի է, որ արջ է եղել։ Հետո, եթե գայլ լիներ, չէր կարողանա խնձորի ծանր արկղերը շուռ տար և ուտեր»։
