Արտակարգ դեպք Երևանում․ 24-ամյա վարորդը BMW-ով բախվել է քարե պատնեշին, հսկայական կտորները պոկվել են ու թափվել մեքենաների վրա
Արտակարգ դեպք Երևանում․ 24-ամյա վարորդը BMW-ով բախվել է քարե պատնեշին, հսկայական կտորները պոկվել են ու թափվել մեքենաների վրա
Shamshyan.com-ը գրում է․ Այսօր՝ հունվարի 3-ին, արտակարգ դեպք է տեղի ունեցել Երևանում։ Ժամը 20։45-ի սահմաններում Երևանի բնակիչ 24-ամյա Հասմիկ Հ․-ն իր վարած BMW մակնիշի ավտոմեքենայով Սարալանջի ճանապարհից Հերացի փողոց ընթանալիս, դուրս է եկել երթևեկելի գոտուց, բախվել բետոնե պատնեշին։
Ինչպես դեպքի վայրից հայտնում է ֆոտոլրագրող Գագիկ Շամշյանը, ըստ նախնական տեղեկությունների՝ վթարի հետևանքով, բարեբախտաբար, տուժածներ չկան։
Ֆոտոլրագորղը հայտնում է, որ բետոնե պատնեշին բախվելուց հետո հսկայական բետոնե մի քանի հատվածներ կոտրվել ու մոտ 5 մետր բարձրությունից շպրտվել են, ինչի հետևանքով վնասվել են Արտակարգ իրավիճակների նախարարության Փրկարար ծառայության Երևանի թիվ 8-րդ հրշեջ-փրկարարական ջոկատի վարչական տարածքում կայանված հրշեջ-փրկարարների Mazda և Nissan մակնիշի ավտոմեքենաները։
Բարեբախտաբար, հրշեջ-փրկարարներն այդ պահին եղել են մեքենաներից մոտ 2 մետր հեռավորության վրա։
Օպերատիվորեն ժամանել են ՀՀ ոստիկանության Պարեկային ծառայության Երևանի գնդի 4-րդ գումարտակի 2-րդ վաշտի պարեկները՝ գումարտակի հրամանատար Արմեն Գասպարյանի, վաշտի հրամանատար Ստաֆֆի Դիլանյանի գլխավորությամբ։
Տեղում ծառայություն են կատարում և տարածքը սահմանազատել են նույն վաշտի ավագ պարեկ Գոռ Մանվելյանն ու կրտսեր պարեկ Ռաֆիկ Հովսեփյանը։
Վթարի փաստով՝ Պարեկային ծառայության Երևանի գնդի 4-րդ գումարտակում նյութեր են նախապատրաստվում։ Պարզվում է նաև կայանված ու վնասված ավտոմեքենաների սեփականատերերի ինքնությունը։
