Գյուրզան խայթել էր 2 անգամ, սկսվել էր մկանային քայքայում. ինչպես է օձի կծելուց թունավորված 12-ամյա տղայի վիճակը
Գյուրզան խայթել էր 2 անգամ, սկսվել էր մկանային քայքայում. ինչպես է օձի կծելուց թունավորված 12-ամյա տղայի վիճակը
Օրեր առաջ օձի խայթոցից «Մուրացան» համալսարանական հիվանդանոց է տեղափոխվել 12-ամյա տղա:
Երեխան Արագածոտնի մարզի Աշտարակ տարածաշրջանի Բազմաղբյուր գյուղից է: Հողամասում՝ հորն օգնելիս, գյուրզա օձը երկու տեղով ՝ աջ ոտնաթաթի կոճերի շրջանում խայթել է, ոտքի վրա կծածի 4 հետքեր են նկատվել: Ոտքը սկսել է ցավել, այտուցվել, երեխան ունեցել է անհանգստություն, սրտխառնոց, փսխումներ:
Նրան տեղափոխել են հանրապետության բժշկական կենտրոններից մեկը, որից հետո ՝ «Մուրացան» համալսարանական հիվանդանոց:
«Մուրացան» համալսարանական հիվանդանոցից Bavnews.am-ին հայտնում են, որ թունաբանության և մանկական վերակենդանացման կլինիկայի ղեկավար, անեսթեզիոլոգ-ռեանիմատոլոգ, թունաբան Մարինե Գրիգորյանը նշել է, թե օձի թույնից զարգացել են երկտեղանի սիստեմոտոքսիկ ռեակցիաներ, արյան մակարդելիության խանգարում, հեմոլիզ, մկանային քայքայումներ և այլ ախտանշաններ:
Համալսարանական հիվանդանոցում երեխան ստացել է հակաթույն և ախտանշանային բուժում:
Հիվանդի հիմնական բուժման համար երեխան անցել է նաև բարոթերապիայի 5 սեանս: Առաջին իսկ սեանսից փոփոխությունը նկատելի է եղել. բարոթերապիայի հզոր, հակաայտուցային, ցավազրկող, թունազերծող ազդեցության շնորհիվ այտուցն աստիճանաբար իջել է, ցավը նվազել: Երեխան դուրս է գրվել համալսարանական կլինիկայից:
