ԺամանցՄամուլ

Եթե կինը երջանիկ չէ, նա չի կարող երջանկացնել ամուսնուն ու զավակներին. Նազենի Ղարիբյան

Եթե կինը երջանիկ չէ, նա չի կարող երջանկացնել ամուսնուն ու զավակներին. Նազենի Ղարիբյան

Հայաստանի կառավարությունում, որի անդամների մեծամասնությունը տղամարդիկ են, կանայք իրենց ճնշված չեն զգում։ Այս մասին Sputnik Արմենիայի հետ զրույցում ասաց մշակույթի փոխնախարար Նազենի Ղարիբյանը։ Նրա խոսքով` կառավարությունում աշխատելը դժվար է այն կանանց համար, ովքեր աշխատանքային պարտավորություններից զատ նաև ընտանեկան պարտականություններ ունեն։

«Սա մաքսիմալ էներգիա է պահանջում, մաքսիմալ ներդրում և այն մի փոքրիկ ժամանակը, որ մնում է տանն անցկացնելու համար, շատ քիչ է, որպեսզի կինը կարողանա երեխաներին, ամուսնուն պատշաճ ուշադրություն հատկացնել»,– ասում է Նազենի Ղարիբյանը` հավելելով, որ հաճախ է մտածում, որ եթե երեխաները դեռ փոքր լինեին, չէր կարողանա այս չափով նվիրվել աշխատանքին։

«Մեր ավանդական ընտանիքներում, երբ տղամարդիկ աշխատանքից տուն են գնում, հանգստանում են, հեռուստացույց են նայում ։ Բայց, երբ կանայք են տուն գնում, սկսվում է երկրորդ աշխատանքը` ճաշը, սեղանը, ամանները, երեխաները և այլն։ Կինը նաև շաբաթ–կիրակի չունի, որովհետև տանն էլի աշխատում է»,– ասում է Ղարիբյանը։

Իսկ շատ աշխատող կինը, Նազենի Ղարիբյանի դիտարկմամբ, շուտ է մաշվում, շուտ ծերանում ու նաև` շուտ հեռանում կյանքից։

Մարտի 8-ը Նազենի Ղարիբյանը չի սիրում, բայց ընդունում է, որպես կանանց իրավունքների պաշտպանության օր, հատկապես որ Հայաստանում, նրա համոզմամբ, կանայք պաշտպանության կարիք ունեն և պետք է իրենց իրավունքների մասին բարձրաձայնեն ոչ թե տարվա մեջ միայն մեկ օր կամ մեկ ամիս, այլ իր ամենօրյա պայքարով։

«Կանայք ոչ թե պիտի նստեն ու սպասեն, որ իրենց ինչ-որ իրավունքներ տրվեն, այլ պիտի պայքարեն իրենց իրավունքների համար»,– ասում է Ղարիբյանն ու հավելում, որ ինքն այդպես է վարվում, ընդ որում` ոչ միայն իր, այլև իրեն շրջապատող բոլոր կանանց համար։

«Դա կարող է լինել իմ հարազատ ընկերների տանը։ Կատակով ասեմ` կինդ ճաշ է եփում, դու էլ ամանները լվա»,– պատմում է մշակույթի կին փոխնախարարը` հավելելով, որ կատակով է ասում, որ տղամարդիկ չնեղանան, բայց իրականում վստահ է` կինը պիտի երջանիկ լինի, որ կարողանա երջանկացնել ամուսնուն ու երեխաներին։

Իսկ երջանիկ է այն կինը, ով ունի հանգստի, աշխատանքի, ուսման իրավունք։ Ու չնայած բոլոր դժվարություններին, հայ կանայք, Նազենի Ղարիբյանի, համոզմամբ հերոս են։

«Թող տղամարդիկ չնեղանան, բայց 90- ականներին մեր երկիրը հայ կանայք պահել են իրենց ուսերի վրա»,– ասում է նա` համոզված, որ այդ հարցում հայ տղամարդիկ էլ նույն կարծիքին են։

Որպես կին ղեկավար, Նազենի Ղարիբյանը վստահեցնում է, որ իր ենթակաների միջև սեռային տարբերակում չի դնում։ Բայց մի փոքր մտածելուց հետո ավելացնում է` կանանց համերաշխությունը գործում է նաև աշխատավայրում, «երբեք թույլ չեմ տա, որ նրանց ինչ-որ մեկը նեղացնի»։

Մշակույթի նախարարի տեղակալ, նախարարի պարտականությունները ժամանակավորապես կատարող Նազենի Ղարիբյանը 53 տարեկան է։ Ամուսնացած է, երկու դուստրերի մայր։ Զավակները 18 և 32 տարեկան են, առայժմ չամուսնացած։

Աղբյուր՝ armeniasputnik.am

Կիսվել նյութով