Փաշինյանը սահմանադրական ճանապարհո՞վ եկավ իշխանության. Վանեցյանի կարծիքով այս հարցում կա մեծ բանավեճ
Փաշինյանը սահմանադրական ճանապարհո՞վ եկավ իշխանության. Վանեցյանի կարծիքով այս հարցում կա մեծ բանավեճ
Անկեղծ ասած՝ ինձ հունից հանելը շատ դժվար է, գրեթե անհնար. դա անգամ մեկ-մեկ ինձ խանգարում է իմ էմոցիաները ցուցադրել: Այս մասին հայաստանյան թերթերի խմբագիրների հետ հանդիպման ժամանակ նշել է ԱԱԾ նախկին տնօրեն Արթուր Վանեցյանը:
«Բայց կարող եմ ֆիքսել մի բան՝ վերջին շրջանում իմ դեմ տարվող տեղեկատվական արշավը շատ վաղուց էր պլանավորված եւ դերաբաշխված՝ դեռեւս, երբ ես ԱԱԾ տնօրեն էի:
Եթե դուք կհիշե՞ք՝ իմ պաշտոնավարման վերջին մի քանի ամիսներին ինչ-որ տարբեր տեղերից ուղղորդված սկսեցին իմ մասին գրել կեղծ եւ ստահոդ հոդվածներ, եւ այդ ամենը տեղավորվում է այն տեղեկատվական արշավի մեջ, որն իմ դեմ իրականացվում է:
Որպես օրինակ՝ կարող եմ բերել վերջին շրջանի հրապարակումներն իմ մասին, որոնցից որեւէ մեկը չհաստատվեց՝ ամբողջությամբ սուտ էին: Այսինքն՝ հրապարակ են բերում մի վարկած, մի թեզ, ներկայացնում են՝ որպես վերջին կետի ճշմարտություն, հետո սկսում են իրենք իրենց հերքել:
Հասանք անգամ նրան, որ ինձ մեղադրեցին պետական հեղաշրջում կազմակերպելու մեջ»,-ասել է Վանեցյանը՝ հավելելով, որ այդ ամենի հետեւանքով ունեցանք՝ մի անլուրջ իրավիճակ.
«Հայտնի թերթը իմ մասին գրում է մի հոդված, որտեղ ինձ մեղադրում են պետական հեղաշրջման մեջ, եւ այլնի, եւ այլնի մեջ, ես, իհարկե, արձագանքում եմ, հերքում եմ: Դուրս է գալիս մի բարձրաստիճան պետական պաշտոնյա՝ Ազգային անվտանգության խորհրդի (ԱԱԽ) քարտուղար, պատգամավոր եւ այլն, եւ պնդում են, որ նման փորձ է եղել, որ ես մասնակից եմ եղել պետական հեղաշրջման փորձի:
Այնուհետեւ ստանում ենք ԱԱԾ պաշտոնական պարզաբանումն այդ ուղղությամբ, որ նման դեպք չի եղել, նման փորձ չի եղել:
Դրանից հետո Նիկոլ Փաշինյանը հայտարարում է, որ՝ մենք այդպես չենք ասել, մենք ասել ենք, որ դա հիբրիդային հեղաշրջում է… Օրակարգ է բերվում մի տերմին, որն օգտագործվել է, եթե չեմ սխալվում, Ուկրաինայում: Դա ուղղակի… չգիտեմ, խոսքեր չեմ գտնում ասելու, այդ անլրջությունը, որ տրվում է այդ ամեն ինչին:
Պետական հեղաշրջման փորձ իրականացնող մարդը պետք է նստած լիներ համապատասխան վայրում»:
Հարցին, թե կարելի՞ է հասկանալ, որ ինքը նման ցանկություն չի ունեցել, Վանեցյանը պատասխանել է.
«Իհարկե, ես նման ցանկություն չեմ ունեցել, ընդհակառակը՝ ցանկացած մարդ, ով կփորձի իրականացնել պետական հեղաշրջում, կամ հակասահմանադրական ճանապարհով կփորձի տիրանալ իշխանությանը, այդ մարդը պետք է դատապարտվի եւ կրի իր պատիժը:
Իրավունք չկա՝ հակասահմանադրական ճանապարհով կատարել որեւէ քայլ. թե այդ քայլը ինչ նպատակներով դրդված կլինի՝ որեւէ կապ չունի»:
Հարցին,թ ե Նիկոլ Փաշինյանը սահմանադրական ճանապարհո՞վ տիրացավ իշխանությանը, նա արձագանքելն է.
«Այդ հարցի շուրջ կա մեծ բանավեճ, որոշ շրջանակներ ասում են, որ ոչ, որոշ շրջանակներ ասում են՝ այո, բայց ես, եկեք, մի քիչ ավելի խորը պատասխանեմ այդ հարցին: 2018թ. ապրիլ-մայիս ամիսներին այն, ինչ տեղի ունեցավ ՀՀ-ում, աննախադեպ էր:
Ամբողջ ժողովուրդը փոփոխությունների ակնկալիքով եւ պահանջով դուրս եկավ հանրապետության փողոցներ եւ իր պահանջը ներկայացրեց:
Ես՝ լինելով ԱԱԾ աշխատակից, կարող եմ ձեզ հավաստիացնել, որ անգամ պետական կառույցներում, չնայած՝ որեւէ կերպ դա չէր արտահայտվում գործողություններով, մարդիկ սպասում էին փոփոխությունների, եւ այդ փոփոխությունները եղան:
Հետագայում եղան զարգացումներ՝ խորհրդարանի լուծարում, եւ այլն, եւ այլն, եւ մենք ունեցանք այն, ինչ այսօր ունենք:
Համաձայն չեմ այն պնդման հետ, որ առաջին փուլը հակասահմանադրական էր, որովհետեւ եղել է ժողովրդի պահանջ, նախկին իշխանությունները՝ ի դեմս Սերժ Սարգսյանի, որոշում են կայացրել գնալ ժողովրդի պահանջի կատարման ուղղությամբ, եւ հրաժարական ներկայացրել ու իշխանությունը հանձնել Նիկոլ Փաշինյանին:
Բացի նրանից, որ հանձնվել է, նաեւ ՀՀԿ-ն, որն այդ ժամանակ խորհրդարանի մեծամասնությունն էր, աջակցել է Նիկոլ Փաշինյանին՝ սահմանադրական ճանապարհով վարչապետ ընտրվել:
Այ, թե ինչ եղավ հետո, դա արդեն խորը վերլուծության եւ զրույցի թեմա է, որի մասին մի օր առանձին կխոսենք եւ փակագծեր կբացենք»:
