Ուզում ենք հավատալ, որ Փաշինյանի վճռականությունը բավարար կլինի՝ պաշտպանելու հայկական շահերը. Շանթ Հարությունյան
«Ցեղակրոն» կուսակցության նախագահ Շանթ Հարությունյանը հանդես է եկել հայտարարությամբ, որտեղ անդրադարձել է վերջին օրերին Ռուսաստանի եւ ՀԱՊԿ-ի անդամ մյուս երկրների հետ Հայաստանի լարված հարաբերություններին:
Հայտարարությունում ասվում է.
«- Վերջին օրերին լայն քննարկումների առիթ է դարձել Հայաստանի լարված հարաբերությունները Ռուսաստանի եւ ՀԱՊԿ-ի անդամ մյուս երկրների հետ։ Այս քննարկումներն ավելի բանավիճային են դառնում, քանի որ այս ամենը անմիջականորեն կապված է արցախյան հիմնախնդրի լուծման տարբերակների հետ։ Այսինքն՝ այս ամենը առնչվում է Հայաստանի եւ հայ ժողովրդի կենսական շահերին, առավելապես՝ պատերազմի եւ խաղաղության թեմային։
– Նման պայմաններում, երբ տոտալ քարոզչական պատերազմ է սանձազերծվել Հայաստանի դեմ, իր այսպես կոչված դաշնակիցների՝ Ռուսաստանի, Բելառուսի, Ղազախստանի եւ մյուս երկրների կողմից, համոզված ենք, որ այս պահին, մեր ներքին գաղափարա-քաղաքական տարաձայնությունները պետք է մի կողմ թողնել եւ միասնաբար դիմակայել արտաքին ճնշումներին։
– Որքան էլ, որ մեր համար անընդունելի է Նիկոլ Փաշինյանի ռուսամետ քաղաքականությունը, մասնավորապես՝ ԱՊՀ, ԵՏՄ, ՀԱՊԿ կառույցներին անդամակցելը, այնուամենայնիվ, ուզում ենք հավատալ, որ Նիկոլ Փաշինյանի հայրենասիրությունը եւ վճռականությունը բավարար կլինի՝ պաշտապնելու հայկական շահերը, ինչպես նաեւ արժանի հակահարված տալու բոլոր պուտիններին, լուկաշենկոներին եւ բոլոր այլ սուլթաններին։
Ստորագրում ենք՝
Շահեն Հարությունյան (Ազգային Միացյալ Կուսակցության հիմադիր. հիմնադրված՝ 1966թ. ապրիլի 24)
Շանթ Հարությունյան (Ցեղակրոն կուսակցության նախագահ. հիմնադրված՝ 1987թ. դեկտեմբերի 1)
Շահեն Հարությունյան կրտսեր (Ազգային Միացյալ Նախաձեռնության նախագահ. հիմնադրված՝ 2016թ. հուլիսի 7)
