Խոշոր ավտովթար Արագածոտնի մարզում․ Շենավանի խաչմերուկում բախվել են Mercedes-ը, բեռնատար «Գազել»-ը ու 2 «Կամազ»
Խոշոր ավտովթար Արագածոտնի մարզում․ Շենավանի խաչմերուկում բախվել են Mercedes-ը, բեռնատար «Գազել»-ը ու 2 «Կամազ»
Shamshyan.com-ը գրում է․ Այսօր՝ դեկտեմբերի 28-ին, խոշոր ու շղթայական ավտովթար է տեղի ունեցել Արագածոտնի մարզում։
Ժամը 11։00-ի սահմաններում Երևան-Վանաձոր ավտոճանապարհին, Շենավան գյուղի վարչական տարածքում, ժողովրդի լեզվով ասած՝ Շենավանի խաչմերուկում, բախվել են Mercedes, 2 KamAZ և բեռնատար ГАЗель մակնիշի ավտոմեքենաները։
Ինչպես դեպքի վայրից հայտնում է ֆոտոլրագրող Գագիկ Շամշյանը, բախման հետևանքով KamAZ-ներից մեկն էլ բախվել է նշված վայրում գործող «Կանթեղ» առևտրի կենտրոնի դիմաց կայանված Mitsubishi Pajero iO և Toyota Corolla մաիկնիշի ավտոմեքենաներին։
Ըստ նախնական տեղեկությունների՝ բարեբախտաբար, տուժածներ չկան։ Երբ KamAZ-ը բախվել է Mitsubishi Pajero iO-ին, կոտրել է նաև խանութի հսկայական ապակին, խանութին պատճառվել է նաև նյութական վնաս։
Օպերատիվորեն ժամանել են Ճանապարհային ոստիկանության 2-րդ սպայական գումարտակի Արագածոտնի մարզն սպասարկող դասակի ծառայողները՝ դասակի հրամանատար Գարիկ Սարգսյանի գլխավորությամբ։
Ժամանել են նաև ոստիկանության Ապարանի բաժնի օպերատիվ խումբը՝ բաժնի պետ Ռաֆայել Պողոսյանի և անձնակազմի գծով բաժնի պետի տեղակալ Էդգար Խաչատրյանի գլխավորությամբ։
Ապարանի ոստիկանությունն ու ճանապարհային ոստիկանները պարզում են վարորդների ինքնությունը։ Օպերատիվորեն ժամանել են նաև ապահովագրական ընկերությունների ներկայացուցիչները։
Վթարի փաստով ՃՈ 2-րդ սպայական գումարտակի Արագածոտնի մարզն սպասարկող դասակում նյութեր են նախապատրաստվում։
