Արտակարգ դեպք Երևանում․ հայր ու որդիների վիճաբանությունն ավարտվել է նրանցից մեկին հիվանդանոց տեղափոխելով

Արտակարգ դեպք Երևանում․ հայր ու որդիների վիճաբանությունն ավարտվել է նրանցից մեկին հիվանդանոց տեղափոխելով

Shamshyan.com-ը գրում է․ Այսօր՝ հունվարի 27-ին, արտակարգ դեպք է տեղի ունեցել Երևանում։ Ժամը 12։55-ի սահմաններում «Աստղիկ» բժշկական կենտրոնից ՀՀ ներքին գործերի նախարարության Ոստիկանության Մալաթիայի բաժին ահազանգ է ստացվել, որ «գանգուղեղային վնասվածք» ախտորոշմամբ իրենց մոտ է տեղափոխվել մի քաղաքացի։

Ինչպես հայտնում է ֆոտոլրագրող Գագիկ Շամշյանը, հիվանդանոց է մեկնել ՀՀ ՆԳՆ Ոստիկանության Մալաթիայի բաժնի օպերատիվ խումբը՝ բաժնի պետ Անդրանիկ Մելոյանի գլխավորությամբ։ 

Ոստիկանները պարզել են, որ վիրավորը, ով ըստ բժիշկների հայտարարության՝ ի վճակի չէ կատարվածի մասին բացատրություն տալու, քանի որ գտնվում է ծայրահեղ ծանր վիճակում և վիրահատարանում է, Հաղթանակ թաղամասի բնակիչ 48-ամյա Արամայիս Մ․-ն է։

Մինչ բժիկները պայքարում էին նրա կյանքի համար, Մալաթիայի ոստիկանները տաք հետքերով պարզել են, որ նույն օրը՝ ժամը 12։00-ի սահմաններում, Հաղթանակ թաղամասի 2-րդ փողոցի թիվ 36 տան դիմաց կենցաղային հարցերի շուրջ վիճաբանություն է տեղի ունեցել Երևանի բնակիչներ 29-ամյա Տարոն Մ․-ի, հիվանդանոց տեղափոխված Արամայիս Մ-ի և մյուս կողմի՝ Երևանի բնակիչներ 49-ամյա Վալերի Բ․-ի, 27-ամյա Յուրիկ Բ․-ի միջև, որի ընթացում էլ Յուրիկ Բ․-ն աշխատանքային գործիքով հարվածել է Արամայիս Մ․-ի գլխին, պատճառելով ծանր մարմնական վնասվածք։

Մալաթիայի ոստիկանները «Աստղիկ» բժշկական կենտրոնի մոտ հայտնաբերել են Վալերի Բ․-ին, ով հիմնավոր կասկածանքով ձերբակալվել և տեղափոխվել է Ոստիկանության Մալաթիայի բաժին։

Դեպքի փաստով Հայաստանի քննչական կոմիտեի Երևան քաղաքի քննչական վարչության Մալաթիայի քննչական բաժնում նախաձեռնվել է վարույթ։Ոստիկանությունը ձեռնարկում է անհրաժեշտ միջոցառումներ Յուրիկ Բ․-ին և հանցագործության գործիք՝ «քլունգը» հայտնաբերելու ուղղությամբ։ 

Գ․ Շամշյանի տեղեկություններով՝ Տարոն և Արամայիս Մ․-երը, ինչպես նաև՝ Վալերի և Յուրիկ Բ․-երը հայր ու որդիներ են։