Իրանի ԱԳՆ պատասխանել է Ալիևին

Իրանի ԱԳՆ պատասխանել է Ալիևին

Իրանի արտաքին գործերի նախարարը շինծու և կեղծ է անվանել Հայաստանի և Իրանի մասնակցությամբ թմրանյութերի ապօրինի շրջանառության մասին Ադրբեջանի նախագահի մեղադրանքները, հայտնում է IRNA գործակալությունը:

Պատասխանելով Իլհամ Ալիևի հայտարարություններին՝ Իրանի Իսլամական Հանրապետության ԱԳՆ ներկայացուցիչ Սայիդ Խաթիբզադեն նշել է, որ այդ արտահայտությունները ծառայում են «միայն սիոնիստական ռեժիմի» շահերին և դեմ են Թեհրանի ու Բաքվի միջև «եղբայրական հարաբերություններին»:

«Իրանի Իսլամական Հանրապետությունը առաջատար դեր է խաղում թմրանյութերի ապօրինի շրջանառության դեմ պայքարում։ Մենք ունեցել ենք հազարավոր նահատակներ և վիրավորներ, որոնք վերջին չորս տասնամյակների ընթացքում իրենց նվիրել են այդ վատ երևույթի դեմ պայքարին»,- նշել է Խաթիբզադեն։

Նրա խոսքով՝ թմրանյութերի ապօրինի շրջանառության դեմ պայքարում բազմաթիվ մարդկային զոհերը այդ ուղղությամբ Իրանի շարունակական անձնուրաց ջանքերի միայն մի փոքր մասն են։ Այդ փաստը բազմիցս հաստատվել է միջազգային համապատասխան մարմինների կողմից։

«Ցավոք, տպավորություն է ստեղծվում, որ չնայած տարբեր շփումների ընթացքում Բաքվից ստացվող մասնավոր և դրական հաղորդագրություններին, այնտեղ միտումնավոր անհիմն հայտարարություններ են արվում ԶԼՄ-ներում, որոնց մենք, անկասկած պատասխան կտանք»,- ընդգծել է Խաթիբզադեն:

Ավելի վաղ Ադրբեջանի նախագահը, ելույթ ունենալով ԱՊՀ-ի առցանց գագաթնաժողովում, ասել էր, որ 30 տարի շարունակ Հայաստանն Իրանի հետ օգտագործել է Լեռնային Ղարաբաղի տարածքները դեպի Եվրոպա թմրանյութերի շրջանառությունը կազմակերպելու համար: