Երևանում պարեկները բռնել են կարմիր լույսի տակով անցնող BMW-ի վարորդին, ով հայտնի «Ճվճվ Արոյի» որդին է

Երևանում պարեկները բռնել են կարմիր լույսի տակով անցնող BMW-ի վարորդին, ով հայտնի «Ճվճվ Արոյի» որդին է

Shamshyan.com-ի տեղեկություններով՝ այսօր՝ հունվարի 16-ին, ՀՀ ներքին գործերի նախարարության Ոստիկանության պարեկային ոստիկանության Երևանի գնդի 4-րդ գումարտակի 1-ին վաշտի պարեկները՝ գումարտակի հրամանատար Արմեն Գասպարյանի, գումարտակի հրամանատարի տեղակալ Կարեն Ավետիսյանի և վաշտի հրամանատար Արսեն Ստեփանյանի գլխավորությամբ իրականացրել են «Կարմիր կովն իր կաշին չի փոխի» օպերացիան։ 

Ինչպես դեպքի վայրից հայտնում է ֆոտոլրագրող Գագիկ Շամշյանը, Պարեկային ծառայության Երևանի գնդում օպերատիվ տեղեկություններ են ստացված եղել, որ Երևանում ռուսական համարանիշներով BMW մակնիշի ավտոմեքենան տևական ժամանակ է չարամտորեն խախտում է ճանապարհային երթևեկության կանոնները, վթարային իրավիճակներ ստեղծում վարորդների ու հետիոտների համար։ 

Այսօր պարեկները նշված ավտոմեքենան նկատում են Բագրևանդ թաղամասում երթևեկելիս, որի վարորդը հերթական անգամ չարամտորեն խախտում է թույլ տալիս։ Եվ նույն վաշտի ավագ պարեկ Ռաֆայել Գրիգորյանն ու պարեկ Լուսինե Մանուկյանը փորձում են կանգնեցնել BMW-ն։ Սակայն վարորդը, չենթարկվելով պարեկների օրինական կանգառ հրահանգին, դիմում է փախուստի։

Պարեկները մոտ 5-6 կմ հետապնդում են, ու արդեն Դ․ Մալյան փողոցում BMW-ն կարմիր լույսի տակով անցնում է խաչմերուկը, բախվում բնակչի շինության քարե պարսպին, ապա առաջ ընթանում ու բախվում բետոնե էլեկտրասյանը։ 

Ավտոմեքենայի միջից վարորդը դուրս է գալիս ու դիմում փախուստի, բայց ինչպես ժողովուրդն է ասում՝ «Կատվի խաղը, մկան մահը»։ Պարեկները մոտ 500-600 մետր հետապնդում են նրան ու բռնում ։ 

Ֆոտոլրագրողի տեղեկություններով՝ պարզվում է, որ վարորդը հասարակությանը հայտնի «Ճվճվ Արոյի» անուղղելի տղան է՝ Երևանի բնակիչ 31-ամյա Սարգիս Վարդանյանը, ով նախկինում եղել է դատապարտված, այդ թվում՝ մահվան ելքով ավտովթարի համար, ինչի հետևանքով 2 ճանապարհային ոստիկաններ էին մահացել, ինչպես նաև նա հայտնի է քրեական ու հակաիրավական պատմություններով։ 

Անձնական խուզարկությամբ նրա մոտ հայտնաբերվում է 0․23 գրամ սպիտակ բյուրեղանման զանգված։ 

Վերջինս ապօրինի թմրամիջոց պահելու և օգտագործելու կասկածանքով ձերբակալվում և ներկայացվում է ՀՀ ՆԳՆ Ոստիկանության Նոր Նորքի բաժին, որտեղից էլ ներկայացվում է Հայաստանի քննչական կոմիտեի Երևան քաղաքի քննչական վարչության Ավան և Նոր Նորք վարչական շրջանների քննչական բաժին։

Ֆոտոլրագրողի տեղեկություներով՝ ավտոմեքենայում նույնպես հայտնաբերվել է կասկածելի թմրամիջոց, իսկ BMW-ի վրա տեղադրված համարանիշները փոխարինված են եղել։