«Volkswagen»-ի վարորդը՝ Դավթաշենի կամրջի վրա վրաերթի է ենթարկել մեկ այլ վարորդի, երբ նա փորձել է փոխել իր ավտոմեքենայի անվադողը
Shamshyan.com-ը գրում է․ Երեկ՝ հուլիսի 7-ին, արտակարգ դեպք է տեղի ունեցել Երևանում: Ժամը 19:40-ի սահմաններում Դավիթաշենի կամրջի վրա Դավիթաշեն վարչական շրջանից դեպի Արաբկիր վարչական շրջան ընթանալիս Երևանի բնակիչ 68-ամյա Հակոբ Ա.-ն իր վարած «Volkswagen» մակնիշի ավտոմեքենայով վրաերթի է ենթարկել Սյունիքի մարզի բնակիչ 22-ամյա Ալեքսան Հ-ին, այնուհետև բախվել վերջինիս կողմից կայանած «Nissan» մակնիշի ավտոմեքենային:
Վրաերթի ենթարկվածը մարմնական վնասվածքներով տեղափոխվել է «Արմենիա» բժշկական կենտրոն:
«Volkswagen»-ի վարորդը փախուստի չի դիմել, օգնություն է ցուցաբերել օպերատիվորեն ժամանած շտապօգնության բժիշկներին վիրավորին տեղափոխել հիվանդանոց:
Վթարի փաստով քննչական բաժնում նախաձեռնվել է քրեական վարույթ:
Աղբյուրի տեղեկություններով՝ վրաերթի ենթարկված Ալեքսան Հ.-ն կամրջի վրա կայանել էր իր «Nissan»-ը, քանի որ հետևի անվադողը վնասվել էր, և նա փորձել է խոտանը վերացնել, այդ ժամանակ «Volkswagen»-ը վրաերթի է ենթարկել նրան ու բախվել «Nissan»-ին:
