«Օշականցի Գևորիկի» հետ հարցերը լուծելու խնդրով դիմած անձը ՔՊ-ից է, Վանաձորի քաղաքապետարանի պաշտոնյա
24News-ին հայտնի է դարձել, որ քաղաքացուց 250 հազար դոլար պահանջած «օրենքով գող» Օշականցի Գևորիկի հետ հարցերը կարգավորելու նպատակով մեկ այլ օրենքով գողի՝ Ս.Հ.-ին դիմած անձը Վանաձորի համայնքապետարանի կրթության, մշակույթի և տուրիզմի հարցերի բաժնի ղեկավար Քրիստինե Մադոյանն է։
Քրիստինե Մադոյանը հանդիսանում է ՔՊ կուսակցության անդամ, ինչպես նաև՝ ՊՆ նախարար, իշխող կուսակցության վարչության անդամ Սուրեն Պապիկյանի հետ ունի մտերիմ հարաբերություններ։
Երեկ Քննչական կոմիտեն հայտարարություն էր տարածել, որ հատկապես կարևոր գործերի քննության գլխավոր վարչությունում քննվող քրեական վարույթի նախաքննության ընթացքում ԱԱԾ աշխատակիցների հետ համատեղ իրականացված միջոցառումների արդյունքում պարզվել է, որ քրեական աստիճանակարգության բարձրագույն կարգավիճակ ունեցող անձը գործելով քրեական ենթամշակույթ կրող խմբավորման սահմանած և ճանաչած վարքագծի կանոնների համաձայն, ստեղծելով և ղեկավարելով քրեական աստիճանակարգությամբ ու միջանձնային հիերարխիկ հարաբերություններով օժտված անձանց միավորում, քրեական ենթամշակույթ կրող խմբավորման անդամներից տեղեկանալով, որ ՀՀ քաղաքացի Հ.Մ.-ն ՌԴ-ում ծավալած գործունեության ընթացքում մեծ գումարներ է վաստակել, նրանից պահանջել է 250 հզր ԱՄՆ դոլար գումարի չափով անօրինական օգուտ։
Կոմիտեից հայտնել էին, որ Հ.Մ.-ի քույրը, տեղեկանալով նկարագրված խնդիրների մասին, դիմել է քրեական աստիճանակարգության բարձրագույն կարգավիճակ ունեցող Ս.Հ.-ին, ով քրեական ենթամշակույթ կրող խմբավորման հետապնդած նպատակների իրականացման և անօրինական օգուտ ստանալու նպատակով ստանձնել է առաջացած գումարային խնդրի լուծումը:
Արդյունքում, Ս.Հ.-ի և Գ.Մ.-ի միջև պայմանավորվածություն է ձեռք բերվել պահանջված գումարի փոխարեն առավել նվազ՝ 66 հզր ԱՄՆ դոլարին համարժեք 25 մլն 522 հզր 200 ՀՀ դրամ վճարելու շուրջ, որը տուժողի կողմից փոխանցվել է Գ.Մ.-ին:
24News-ը փորձեց կապ հաստատել Քրիստինե Մադոյանի հետ, նրա պարզաբանումը ստանալու համար, սակայն վերջինս չպատասխանեց մեր զանգերին ու հաղորդագրություններին։
Վանաձորի համայանքապետարանից էլ 24News-ին փոխանցեցին, որ կրթության, մշակույթի և տուրիզմի հարցերի բաժնի ղեկավարը հոկտեմբերի 3-ից գտնվում է արձակուրդում՝ 18 օրով։
Հիշեցնենք նաև, որ «Օրենքով գող» Օշականցի Գևորիկը երեկ ձերբակալվել էր։ Մենք փորձեցինք պարզել նրան կալանավորման միջնորդություն ներկայացվե՞լ է, թե ազատ է արձակվել, սակայն քննչական մարմնից դեռևս պատասխան ստանալ չի հաջողվել:
Բայց 24News-ին հայտնի դարձավ, որ Քրիստինե Մադոյանը հարցաքննվել է։
